الله لايبارك في الحب

اش لزّك ياقلبي تحبْ....تذوّقني مُرْ اللّيعة
ولّي في ترابه تغلبْ....محقور لامِنْ يْطيعه
ياما شفت منّو عجبْ.... طَيَّحْ جنودي صْريعة
كلّ جرح دَوَاهْ الطّبْ....وجرحي مْطَلَّعْ طْليعة
لافايدة في كثرة السّبْ....لوم القضا بْديعة
اليوم نحرق جميع كتبْ....مدّاحة في هذي طْبيعة
لاعاش من بعدي الحبّ....صنته في أسوار مْنيعة
حميته من كلّ عطبْ....رفعته عن كلّ وْضيعة
غافلني والسّوق تْنْصَبْ....دلاّل لقلبي يْبيعه
رماه كِي راني وهرب....أرض كَانِتْلَهْ بْليعة
قام قلبي وَزْرِبْ....خالط كي فطيمة تْبيعة
ناديته أرجع تِقْلِبْ....خْزَرْلِي بعين دْميعة
قلّي جْرايْرِكْ ياكْلَبْ....توّة تبغي رْجيعة
بعد المنداف ماتنصب....والذّيب متربّص و قْطيعه
ندمت وطلبت من الرّبّ....يمنّعه من موت مْريعة
والله لا يجعلني سبب....نجيب عمايل فْضيعة
اليوم منّي قلبي تسلب....ذوّقي من المرّ جْريعة
هايم قلّي وين نشب....نبغي نرتاح سْويعة
عقلي منّي تشطب....قَدْري عاد في القيعة
مرمي كيف عود حطب....لامنّو فايدة لاطميعة
الله لايبارك في الحب....لافي عَمْلَهْ لا في صْنيعه
شعّل فيّ نار تلهب....وقّادة من غير هْجيعة
قالوا داوي الحبّ بالحبّ....ورّيتهم من يدّي صْبيعه
قلتلهم نشعف وِنْتُبْ....سَيّْبُوِني طالب شْفيعة
همّلت صلاتي وماوْجِبْ....عامين ماضربت رْكيعة
نعجة جَرْبَة عند جْلَبْ....مولاها يستاهل صْفيعة
هذي حكاية مجرّب.... سوق خاسر بْضيعة
نمشي نحلّ عشرة كتب....يرجع ماعاد نْبيعه
وذاغيري ليه طلب....ناقلبي نقلّعه قليعة
ولّي في هالمركب يركب....ذا غرق يصعب نطليعه
يلعب بيه موج يقلب....يموت موتة شنيعة
**عبدالسّتّار زرّوقي