ياصاحبي نوصّيك ==========

ياصاحبي نوصّيك
==========
ياصاحْبي نْوصّيكْ وْصيّهْ....لا حدْ قبْلي قالْهالِكْ

إذا تبّعت ثنيّة .... سايس ودير بالِكْ

قِيسْ وفكّر شْوَيَّة .... قْبَلْ ما تشق مْسَالِكْ

الدّنيا غدّارة دونيّة... تودّي لكلّ مهالِكْ

ْما يغرّك زين حوريّة...تضحك والفم عَالِكْ

تورّيك ثنيّة مسويّة....وبحرها دهّاس سالِكْ

لا تغطس معاها في ميّة...لايكون الغرق طالِكْ

وِلِّي في بالك وْلِيَّة... تلقاها حوت هالِكْ

توعدك بعيشة هنيّة ...تزيّنلك كلّ أعمالِكْ

ما تفيق كان ببليّة...هلكان والتّعب نالِكْ

أصبر وصبرك عليّ ... أدرس كلّ ما بْدَالِكْ

تَبِّعْ كان التّقيّة ... بدينها تزين أفعالِكْ

بشرفها هي مسمّية ...صوّانة ليك ولعيالِكْ

في بيتك ليّنة طريّة ... والبرّة أرقد هنيّالِكْ

لاتخاف من سَوِ وْلَاسْوِيَّة ... ملاك ربّي هداهالِكْ

تبّع وصيتي هذيّة ... تلقاها راس مالِكْ

مبروكة عْليكْ الهديّة...يا قمرة تْسعْدي بهْلالِكْ
ِ
**عبدالستّار زرّوقي