OK ياأمّناالغاليةالحنينة

تونس ياأمّناالغاليةالحنينة

===============

تونس يا أمّنا الغالية الحنينة ... جيناك مهمومين واسيتينا

ياما الدّنيا قسات علينا ... مالقينا غير حضنك مدفّينا

صبرت علينا كثير وعدّيتِ...شلتِ من فمّك الرّغيف و مدّيت

شبعنا بعزّك وأنت ما ملّيتِ ... وقت الصّقيع إنت تــغـطّينا

ماعاش من يبغيلك مضرّة ... ولا عاش من باع ترابك ياحرّة

عمرنا ما نقدرنجيبلك ضرّة.....ولا نقدر نعوّض صبرك وسنينه

يا أمّنا مايهمّك فعل الخاين....ولاتظنّي برّك علينا هاين

وقت الشّدّة خوفنا عليك باين ... تحدّينا الرّصاص بصدورنا تصدّينا

مهما سرق كنوزك النّهّابة ... ومهما غدر بيك الزّمان وكلابه

إنت الخير إلّي ما ينغلق بابه... وانت العزّ من مجدك رضّعتينا

عيشي عزيزة طول زمانك... مقهور كل من خذلك وخانك

إنت كبيرة مآاعظم شانك....يحميكِ ربِّنا العالي ويحمينا

ربّي كريم جبر كسرك... وزاد التّاريخ كتب  نصر لنصرك

ومن تعدّى عليك ما كسرك... يظلّ حياته بين الشقا وغبينة

إنت ديما شامخة يا خضرا...كل الدّول لنجاح ثورتك منتظرة

الله يرحم من زرع فيك هالبذرة... واحنا لعروقها بدمنا سقينا

حقّقت يوم (أربعطاش) أمجادك ...وغُضْتِ بربيع الثورة حسّادك

و كان في شهر أكتوبر ميعادك ... نسينا زمن القهر وسنينه

اليوم تنفتح أبواب إسعادك ...وتفرحي بدستور مخطوط بضادك

والخير يفيض على كلّ أولادك ... وتنْولد للنّور زهرة ياسمينة

علمك يرفرف فوق بلادك ....ونغنّي ماعاش اللّي خانك

اليوم بجنودك الأمن سادك... وفي عيدك تتقبّلي تهانينا

*عبالسّتّار زرّوقي