ياما نصحتك ماتشتكيني

في عمري ثُرْت مرّة
نلْقاها كالقهوة المُرَّة
لا فهمت نبلعها وبَرَّة
ولاّ ِنلْعِنْ مولى هَالـجُرَّة

في عمري قمت ثاير
نلقى كلبهم بيّ داير
مشيت عالشّوك ساير
.نطّلّع لتونس حرّة

نصيح نقول " ديقاج "ا
وصوت الحرّيّة وهّاج
ْخاطر ومسير عَجَّاج
زَحْفْنَا موفّق هَالْـمَرَّة

نصيحوا بالصّوت المسموع
ماعاد نريد المخلوع
لا تـجمّع ولا مجموع
.الكل " ديقاج " على برّة

ماعاد نريد الأذيال
والسّابع راح من البال
ياحليلي مَاشْوَمْ هَالْفَال
.قدّاش لَـحْقِتْنَا مضرّة

قدّاش عَدُّوهَا علينا
حَطُّوا سارقهم وَالينا
نهب فرّغ الَـخْزِينَة
قْطَعْ علينا المسرّة

ياعيني عليك يا تونس
السّيّدةالأولى فيكِ مومس
تخرج في ليالي ِتدُّومِسْ
السّتر..وتجوع الحرّة

ياعيني عليك يا بلادي
عبثوا بيك وبأولادي
لا نجدة لاَ مِنْ تنادي
الفَارْ يْـحَرِّدْ في الِهرَّة

فرحنا.. بدّلنا التّشكيلة
خلّينا نذوق النّوم ليلة
لَيْلَى خلفت وَسِيلَة
مدّت يديها للجرّة

بعد الصّحن لعب التِّبْسِي
وبعد (القارو) هبط السِّبْسِي
هات الشّيشة نمتّع نفسي
خلّي الثّورة مستمرّة

الثّورة يلزمها ثور
لا ماكينة بلا مُوتُور
وِِلاّ الأرض راهي تبور
ما نبني حتّى اجُرَّة

قالوا عالإنتخابات
هي تمسح كلّ مافات
تنسّينا عهد الويلات
إن شاءالله تِسْلَمْ هالْمَــرَّة

يحيا الشّعب
بعد التّعب
هبط للّعب
هو الِّي يْـِحلْ الصُّرَّة