♡" يازائر القيروان"♡

ياحَايِدْ عَ الدّين والملّة.
)============
ياحَايِدْ عَ الدّين والملّة.............وِمْتَبَّعْ ثْنِيَّةْ إبليسْ

شمس الله ماتغطّيها مظلّة......لا الكفر يِْضَوِّي فْوانيسْ

صوت الحقّ صادح بِالْهِلَّة...........ما يْهِمَّهْ صياح قطاطيسْ

صاعد في سماه يتعلّى.............سكّت جميع نواقيسْ

وأرضه ماتسقيها بلّة.......ولاتعشّش فيها خنافيسْ

فيها نكرع من القلّة.....ماها من النّهر النّفيسْ

في ديني كلمة بسم الله.........تحمينامن كلّ توسويسْ

تشفينا من كلّ علّة.........تبعّدنا عن كل تهلويسْ

كتاب معصوم من الزّلّة........كلامه حكمة وتربيصْ

لاترك ثنيّة ولا فلّة.........لا فيه زيادة وتنقيصْ

لاقاله سيدك بُوبَرْطَلَّة.........لاكِتْبَهْ أَرُسْطُوطَالِيسْ

كلامهم تباع وولّى............عند الحمّاص قراطيسْ

تفضّل أدخل اعمل طلّة...........روحك تحس بتنفيسْ

ماتنوبك فيه المذلّة ........تودّع حياة التّلحيسْ

إنت السّيّد ومرتك لِلاَّ.......إنت الخادم و الرّئيسْ

حياتك بطعمهْ تتْحلّى...........ويذهب هَِمْسْ كواليسْ

كلّمتك وكلامي في محلّه.......لاتكون على كفرك حريصْ

ْلااتّبع اشْ قالت مجلّة.......ولايصيبك منها تْبَنْعِيسْ

غَايِضْنِي حالك إي والله.........شيطانك واقف بوليسْ

إبعد لا تخالط هالشِّلَّة......ولاتْماري عادات فرنسيسْ

إسمع و توكّل على الله........وافعل مافعلت بلقيسْ

عرفت ربّي تِحْمِتْ بظلّهْ.........تركت عرشها النّقيصْ

وفرعون تقول المسلّة..........خذا من موسى ونيسْ

كفر ورفض ما قَالَّهْ..........باع الغالي بالرّخيصْ

جسمه بلْعهْ النّيل بكلّه. ......بقى اية للتّنْصِيصْ

**عبدالسّتّار زرّوقي