الشبعة تعمل...

إذا كان حبّك صافي قُلِّي راني فَهّام
وإذا عندك خلافي قلّي راني مَدَامْ
********
قلّي وما تسكتش عليّ أَحْنا موش فَرْدْ ثنِيَّة
توّة نبعد من هونيّ علاش نكثّر من الكلام
********
علاش كيف تراني تنادي ؟يبدا الحزن عليك بادي
نجيك تتلفّت لغادي والله حرام عليك حرام
********
بالله أعمل معروف لارهبة منّي ولا خوف
ولاعندي ضربان كفوف سمّعني اخر الكلام
********
تلمّت علينا النّاس تشوف كأنّه نهار كسوف
حطّي النّقط على الحروف نوخّر ولاّنزيد لقدّام
********
محال يكون معاك إثنين حتّى لوعندك قلبين
كيف تكوني في عشّين بين فراخ وبين عضام
********
أنا والله ما فهمتك وبحتّى تهمة ما تهمتك
لكن زدت ماإحترمتك وانت تبحث على الصّدام
********
نحترمك أكثر من العادةحبّك ولاّلي عبادة
نلقاك حصان طروادة قلبي تركتيه ركام
********
هديتلك مرّة (كاسات) فيها طقاطق ومعزوفات
سجّلت لي عليها غنايات لاودّ,لا محبّة لاغرام
********
سمعت فيها كلمات توحي بأسوأ ذكريات
كلّها نفي وناهيات خذات من( الصّبا) مقام
********
كلامها موش مفهوم الحكاية عندي كيف اليوم
نهيق مخلّط بصوت البوم متهيّألي في المنام
********
جيتك يمين ويسارنتلفن لك ليل مع نهار
مِسَّاجِكْ ليّ أشار قَلِّي مع السّلام
********
ثُـمَّ طلبتي منّي زيادة قلت حبّي شويّة عبادة
توّجتك مثل ولاّدة لكن أعلى منها مقام
*******
لكن هجرتي(بن زيدون) وفضّلت واحد مجنون
أسنانه ما تعرف (معجون) فُمَّهْ أسود بيت ظلام
********
دَارْ بك الزّمان وبِنْتيِ وخانك كيف ما إنت خنت
رجعت لقيتيني مع بنتي ضحك وجو مع (المدام)
********
رجعت وأنت في حالةفي دبشك ولا قفّالة
لاخرزة لاودعة لا ميّالة قلت تبخرت الأمال
********
تبكي ودموعك سيّالة عيونك صاروا كالسبّالة
لا بلالط لاشَرْكَة لا منقالة الله يهدي أولاد الحرام
********
داروابيك وقت الضّيق العدوّ وَلاَّلِكْ صديق
صوتي عندك صار نهيق كْرَارِطْهُمْ عندك (بِيَامْ
********
قالت بالله سامحني خُنْتِكْ وربّي فضحني
تَوَّة زايد باش تنصحني ولاش تكثّر من الملام
********
ثمّ سألت على المرا قُلْتِلْهاَ اسمها رجا
عرق ونسب ما يتخفّى هبة من عند العلاّم
********
عندي منها أربعة صغار سيّارة ,أراضي وديار
نطلب من ربّي العمار راهي الفايدة في الفهام
********
وبالصلاة على المختار حقّقناالخير والإزدهار
ربّينا صغار وكباروإن شاءالله ديمة لقدّام
********
وأنتِ أخطأتِ في تدبيرك ساهمتِ في خرابك وتدميرك
خّذيتِ من عَدُويَا عشيرك وإن شاءالله بَدْوِ بِتَمَامْ
********
كل واحد بخته باين له إلّي واقف وإلّي مايل له
واحدبالطّاسةولاخربالقلّةواحدلتالي ولاخر لقدّام
********
واحد ناسه تهزّه وتعَلِّيه لاخر تحت الأرض يَجْبْدُو فيه
واحد يموت ,إخوته تُحْيِيه عِزَّهْ يزيد مرفوع الأعلام
********
واحد نَاسَهْ هَزَّازَة حَطَّاَطة لاخر عَفِّسْ الخير بصَبَّاطَه
واحد ياخذ فَارْ بوُسْبَاطَة ِتتْكْلاَطَ عليه الألغام
********
يعود مركزه خالي لاأهل لاجيران لا مَّالِي
يْدِزْهَا لْقُدَّامْ تْوَخِّرْ لْتَالِي مَرْمِي تْعَفْسَهْ الأقدام
********
واحد ياخذ إِلِّي يعِزَّهْ لاَخِرْ مَنْهُوبْ في القعدة والفَزَّة
هُمُومَه قَدْ جبل (طرزّة) دَارَهْ يعشّشها الحمام
********
واحد يتبّع ألّي يفيده لاخر تعبه مخطوف من إيده
لو عنده هناشير (عبيدة)تتبخّر كيف عطسة زكام
********
واحد يلقى أشكون يِفْرِشْلَهْ يرحّب بِيهْ وِيبَشْبِشْلَهْ
الصّعيبة يْهَشْهِشْلَهْ, حياته جنّة يا سلام
********
واحد يجيه إلّي يْقَشْقْشَهْ ويجَرَّدَهْ حتّى من فرشه
عريان والسّقع ينهشه مسافر بيه التّخمام
********
رمات همومها على حظّهانِدْبِت ْوزاد في مرضها
ومن بعد ماباعت أرضهاخْذاَتْ في الرّازي مقام
********
ندمت على هاك الطّيحة وسهران اللّيل وتصبيحه
على جُرَّةخايبة ماهي مليحةالعيشة ولاّت حرام
********
عاد جهدها طايح النّاس عليها تتصايح
الكلمة تقولها بطرايح عيشة السّيّد مع غلام
********
لامال لابنون لازمّارةحتّى الفَارْ هْجَرْلَهْ دَارَهْ
خَلاَّهَا وحدها في مغارةلاماءلاضوء لاطعام
********
حالها عاد كالبوهالي وصفات الدواء وَرَّاتْهَاليِ
"هذا إلّي بقى من راس مالي وإلّي كتبلي من الأقسام
********
صلاتها بلا طهارة تصوم اللّيل وتكمّل نهاره
في الطّريق تحرق الإشارة تولّي تشطح على الطَّامْ طَامْ
********
تغنّي :"بُـمْ ُبُـمْ بَابَا بم قُلِّي اش تكره في الدّم
العرس وكثرة الندم والمال إلّي ماشي حرام
********
شعر/ناصر زيتوني
القيروان