بالحب والودّ مسّيتك

بالحب والودّ مسّيتك
وبالخير صبذحت عليك
من أوّل نظرة حبّيتك
لمّا عيوني رات عينيك
****
تمنّيتك بقربي ياريتك
قلبي متعلق بيك
فرحان يطرب لصوتك
كيف واحد ينادي عليك
****
أتعدّى قدّام حانوتك
قلبي يخلّيني ويجيك
مربوط يتخبّل في خيوطك
يستنّى وقت يلاقيك
****
شافية"..وردات خدودك
وسحر الحب في عينيك
والشفّ في لون ثوبك
الأحمر قاني يواتيك
****
ثوب حرير كاسي عودك
إلّي تلبس يخرج عليك
لوكان نرجع لجدودك
نلقى سلاطين مماليك
****
أنا والله نريدك
أطلب في الحال يجيك
إن شاء الله نكون نصيبك
حياتي وموتي بين يدي
****
فكّيت رموز خطوطك
قالولي "شافية" تداويك
شفايا كيف نسمع صوتك
أحلى عندي مالموزيك
****
ولّي يتبّع ثنيتك
يشفى من خطوة رجليك
وزيد تفّاح خدودك
عسل يقطّر بين سنّيك
****
وبيّ يتعمّر بيتك
نحط يديّا في يديد
في الحين يزداد مردودك
ترابك ذهب بين ساقيك
****
والقلب إلّي في حدودك
سوره واطي بعيد عليك
وقت ما تذبل ورودك
في رمشة عين يخلّيك
****
يسكّر سمعه على صوتك
بقطرة ماء ما يسقيك
و" التران" راهو يفوتك
تقعد عالة على أمّاليك
****
أنا نحبّك ونصونك
بروحي ما نبخلش عليك
نتقدّم نكسّر سدودك
ونغطس في بحر عينيك
****
لله..محلاها عيونك
أنا نحظّك ونواتيك
وإذا تحب تبلغ مقصودك
أنا لتوّة نرجى فيك
****
لو كان نحكي ونزيدك
الدمع يسيل على خدّيك
قلبي يحبّك ويريدك
إلّي تعمل مبروك عليك

من أشعار/
ناصر زيتوني القيرواني
05/02/2005