عندي كنّة
=============
يا وْخَيَّانِي عنْدي كـَنَّة *** سُودَة كَحْلا كِي بُودْرِنّة
لاتهجع وْ لا تِـتْهنَّى *** دِيمَا اطّبْطِبْ بالمهْراسْ
تـْفَزَّعْهَا فْرَاشِيشْ مْعَ جْلاصْ
--------
أوِّلْ صْباحاتْ العِرْسْ *** تـْقومْ مْنِ الفجْريّة تكْنسْ
هَايْ تـْلِمْ وْهَايْ تْكَدِّسْ *** تـْقُولِشْ لَفـْعى بَنْعَاسْ
-------
مَرّة تَـَرْبطْ ..مَرّة تـْقصْ **** تِجْري ..تـْنـَقّـِزْ كِالْفْرسْ
(كَميون) هاربْ مِالْحرسْ *** دْجاجَهْ طايِرْ من الأقْـْفاصْ
--------
تـْقومْ وَقْـْتْ النّاسْ رْقـُودْ *** أزْرقْ وأحْمرْ عَ الْخْدُودْ
تِدْعِي فِي الرَّبْ المَعْبُودْ *** تْولِيّ نَجْمَة فِي دَالاسْ
--------
يَا وْخَيّانِي رَاهِي قتـْلتـْنِي *** هَاذِي عِينْ وْصَابِتـْنِي
جَاتْ تِمْدَحْ فِيَّ شَانـِتـْنِي *** رَدِّتـْنِي دُونْ الأَجْناسْ
--------
مَاغَايِضْنِي كَانْ وْليدي *** جِبْـتِـلّـُّو البْلا بـِيدِي
قـُلـْتِلْها كـَثـْري وْزِيدِي *** نِسْتَاهِلْ حَدْ وِقْـْصَاصْ
--------
بْدَنـْها مجْموعة أقْـْلامْ *** مِنْ رَاسْهَا حتى الأقـْدَامْ
مَا نْرَاهَاشْ فِي الظّلامْْ *** سْويقاتـْها قـْلمْ رْصَاصْ
--------
في دْبَشْها تُظْهُرْ فزّاعة *** تزيد فطعة كلّ ساعة
اللّي يْراها يقولْ بِـِضَاعَة *** مَعْرُوضَة بالأكْدَاسْ
--------
ياواللهِ شَيْ عْجيبْ *** مْعَ السِّروالْ تزيد الجيبْ
تـْريكُو ..رُوبَة وِتـْلابِيبْ *** خايفة من عْيونْ النّاسْ
--------
عَنْدهَا المْلُوخِيّـَة حِنّـَة *** تفْرحْ وْتلـْقـَاهَا جَنّـَة
هذا ما كانت تـِتـْمنّى*** عَمْلِتـْها صَبْغة لِلرّاسْ
--------
عْمايـِلْهَا مْنِ الضُّحْكْ شَبْعَة *** دِيمَا تُحْصُلْ كِيفْ الضّبْعَة
العَشْرَة عَنْدْهَا هِيَ السَّبْعَة *** والـْـقـَادُومة هي الفَاسْ
--------
تِمْشِي تـِشْرِي الدّشِيشْ *** الـقَـضْـيَة تْوَلِّي تْبَرْبِيشْ
تـْرَوِّحْ بِشْكَايِرْ حْـشِيشْ *** عْلَى ظْهَرْهَا قـُدَّامْ النّاسْ
--------
هاهي رجَعت مَرّة أخْرَى *** وْهاذي ماهِياشِ كِالأُخْرَى
في الثّـنيّة تَعْثِرْ في صَخْرَة *** تْجِي مَمْدوَدَة فِي الْكَيّـَاسْ
--------
راجِلْهَا مِنْها يْقـَاسِي *** ديما يرغي "آه"يا رَاسِي
عملوها فِيّ نَاسِي *** أنا تـْعِـبْـتْ مِنْهَا خْلاصْ
--------
قالِـلـْها طَيْبِي الفْطورْ*** بْداتْ تـْشَعِّـلْ فِي الْبَابُورْ
(إيسَانِسْ) يْقَطِّرْ مْنِ المُوتُورْ *** ما بْقَى مِالدَّارْ كانْ السّاسْ
-------
نَادَاهَا مَرَّة " خَدُّوجَة *** إمْـشـي أحْمِي لينا "القـُوجَة"
عَـمْـلِتـْها كِسْرَة مَغْنُوجَة *** أكـَحْـل من قـْلـُوبْ حَمَّـاصْ
--------
مَرَّة تِسْرَحْ بِالنـْعَاجْ *** رَاتْ رَاجِلْهَا فِي اللـُّوَّاجْ
سْـبَقْ.. وْرَاهَا كِالْعْجَاجْ *** تِبْـغِـي تـْبَشْـرَهْ بِالتَّرَّاسْ
--------
عَثـْرِتْ.. طاحِتْ.. الفُمْ عْوَاجْ *** سْبُوعِينْ في المَسَّاجْ
يْدِيها ملـْفُوفَة فِي( بُنـْدَاجْ) *** قـَالِتـْلِي عَادِي لابَاسْ
--------
مْشَاتْ مَرَّة لِلْـفَسْقـِيَّة *** تْحَوِّسْ فِي عْقَابْ عْشِيَّة
دُورَة مِنْ غَادِي وْهُونِـيَّة *** غَـطْـسِتْ وْ قَطْعِتْ الأنْفاسْ
--------
مرّة مْشَاتِ لـْفـَرِيدَة *** تـْبَارِكْ لِلْمَوْلُودَة الجْدِيدَة
هَاهِي تـَلـْعِبْ بِالْوْقِـيدَة *** حْلِيلِي حَرْقِتْ البَالاصْ
--------
نْهَارْ طْلَبْتْ كَاسْ تـَايْ *** عَنْدِي الحَالْ شْهَرْ مَايْ
حُطِّي هَاْوْ رَاجْلِكْ جَايْ *** تْغـَنِّي وتْمَيّّـِلْ فِي الرَّاسْ
--------
قَالِتـْلِي " تـْفَضِّلْ يَا عَمِّي" *** كَاسْ مْنَعْنَعْ ذُقـْتـُو بْفُمِّي
تْعَلـِّمْتْ طْيَابـُو مِنْ أُمِّي *** عَنْدْ خالـْتِي عُقـْبْ نـْفـَاسْ
--------
كِيفْ ذُقـْتـُو بْدِيتْ نِتـْكَوِّرْ *** لـْقـِيتـُو مَاءْ وْفـِلـْفِلْ أحْمِرْ
رُوسُورْ ..انـَّـقِزْ نـِتـْنَطِّرْ*** فُتْ الهُونْدَا فِي الفِيتـَاسْ
--------
قالِتْ عمّي راجلْ مْزَوِّرْ *** عِجْبُو الكَاسْ بْدَا يْدَوِّرْ
أَبْـدَا صَوِّرْ يَا مُصَوِّرْ *** عَنْدِي البطولة وِالكَاسْ
--------
دَبْـرُوا عْـلِيَّ يَا لـَحْبَابْ *** فِعْلْ الكـَنّـَة رَاهُو خْيَابْ
نِبْغِي نْحِلْ عْلِيهَا كـْـتَابْ *** لَوْ نِـمْشِي لِجْبَالْ أَطْلاسْ
--------
عبد الستار زروقي