الصَّاحِبْ =======

الصَّاحِبْ
=======
ْالصَّاحِبْ إِلِـّي مَا تْصِيبَه

أَعْمِلْ عْلِيهْ تَشْطِيبَهْ

ْتَرْتَاحْ مِنْ ثُقْلَهْ وعِيبَه

ْكُلْ وَاحِدْ يْشُوفْ نْصِيبَه

****

ْصَاحْبِكْ لِلْعْدُو عْطَاك

ْبَاعِكْ لْمِنْ شْرَاك

ْمُحَالْ يْكُونْ فْدَاك

ْهَاذِي سْيَاسْتَهْ وتَرْتِيبَه

****

يْبِيعِكْ بِيعَةِ المْهَانَهْْ

بِيعَةِ المِيتْ لِقْيَرْ الجَبَّانَهْ

يَرْدْمِكْ رَدْمَةِ الغْبَانَهْ

وِيزِيدْ فُوقِكْ تَصْطِيبَهْ

****

يَا صَاحْبِي إِفْهِمْ الْمْعَانِي

حْبِيبِكْ رَاهُو تَوَّة جَانِي

بَاعِكْ لِيَّ وهَنَّانِي

ْرَبِّي كْشِفْ أَلاعِيبَه

****

خُوذَهْ بْحِكْمَهْ وسْيَاسَهْ

إِيجَاهْ برِقَّهْ وكْيَاسَهْ

ْإِسْقِيهْ مِنْ مُرْ كَاسَه

كَاسْ الخْيَانَهْ مرَّهْ ومْعِيبَهْ

****

ْشْكُونْ كَانْ يِتْصَوِّر

ْعْشِيـرِي يْخَلِّينِي ويدَوِّر

ْتَصَرْفَهْ دِيـمَا مِتْهَوِّر

ْلا حُكْمَهْ عُمْرَهْ ..لاشِيبَه

****

ْالمُوتْ ..يِتْمَنَّاهَالِك

ْبِيدِيهْ يْقَدِّمْهَالِك

ْشَرْبَةِ المَاءْ يْكُبْهَالِك

وِيزِيدِكْ نَارْ لْهِيبَهْ

***

ْإِذَا حَدْثِكْ..كْذِب

ْيْوَلِّي يَحْكِي بعِلْمِ الطُّب

ْثَرْثَارْ مِنْ غِيرْ سْبَب

في يديه يحمل حقيبة

****

ْبِالْغِيبَهْ عْلِيكْ يَنْطِق

ْيْفَتّقْ في عَرْضِكْ ويرَتِّق

ْلاذَاتْ ..لاصِفَاتْ ..لامَنْطِق

متْرِبِّي في حْجِرْ ذِيبَهْ

****

ْإِبْعِدْ عْلِيهْ تَرْتَاح

ْتَنْسَى عَهْدِ النْوَاح

ْتَبْرَالٍكْ جْمِيعْ لَجْرَاح

لاعَادْ تحتاج لطْبِيبَهْ

****

 ْتُرْقِدْ وانْتَ مُطْمَان

ْوْتِسْمَعْ أَعْذَبْ الأَلْحَان

ْتْصِيرْعَلاقْتِكْ بِالِجيرَان

عَسْلَهْ صَافِيَهْ ومْهِيبَهْ

****

ْمْعَاكْ لايَعْرِفْ إيمَان

ْوْمَا قَالْ رَبِّي فِي القُرْان

ْلاصْلاةْ لازْكَاةْ لا رمْضَان

مَا يَعْرِفْ كانْ التْشَقْلِيبَهْ

****

عُمْرُو لا وَرَّانِي مْسَرَّهْ

يْخَبِّي الحُلْوَة ويـمِدْ المـُرَّهْ

سْمُومَهْ مَصْبُوبَهْ في الجَرَّهْ

كُلْ مَرَّة يِسْقِينِي شْرِيبَهْ

****

وْتَبْقَى العِيشَهْ مُسْتَمِرَّهْ

عُمْرِي مَا نِبْغِي لَهْ مِضَرَّهْ

إلِّي في قَلْبِي عْلَى بَرّْهْ

كِلْمَةِ الوِدْ لِيهْ قْرِيبَهْ

****

يَا سَامْعِي.. الكِلْمَاتْ مْعَانِي

عْلَى صَاحْبِي إِسْأَلْنِي آنِي

تَوَّة مَازَالْ كِي جَانِي

يَحْمِلْ مْعَاهْ مْصِيبَهْ

****

ْيَامَا فَهِّمْتَهْ وْوَرِّيتَه

رْسَمْتْ حْدُودَهْ عَ الخَرِيطَهْ

دَزِّيتْ بِيهْ الكَرِّيطَهْ

وْهُوَ حْصَانَهْ في الزْرِيبَهْ

****

 مَرّة رَوَّحْتْ بَاشْ نِتَّكَّى

خْذَا نَفّْتِي مْنِ الحُكَّهْ

تْرَكْنِي في اللّيلْ نِتْبَكَّى

ْصْغيرْ مفْطومْ عْلى حْليبَه

****

خلاّني نخرجْ عَ السِّكَّهْ

نْراجِي فيهْ نِتْشَكَّى

لحمي كْليتَهْ بالْحَكَّهْ

ورَّاني لَعْويلْ و نْديبَهْ

****

شْنُوَّهْ رايْكُمْ في هَاذِي

جاني يْسامِحْ ويرَاضِي

في يِدُّو وْحَيِّدْ"كَفْتَاجِي

ْيَحلِفْ بالله لا تْسِيبَه

****

مْنِ الحَرْ تْركْني نْلاجِي

مْشَى يْفَرْكِسْ في أَدْرَاجِي

بَدِّلِّي دْوَايِا وعْلاجِي

يُومينْ وانَا في غِيبَهْ

****

ْقُلْتْ بَرَّه ما عْلِينَاش

ْمَرّة أخرى ما نْعَدِّيهَاش

ْنْهَارْ مَا نَعْرِفْ كِيفَاش

تْرَكْلِي السّيارة عْطِيبَهْ

م القرْوانْ تْحِدْهَا ذْهِيبَهْ

****

لكن تَوَّهْ جَا دُورِي

لازم نْوَرِّيهْ زُورِي

نَحِّيتْ فْرَانَاتْ مُوتُورِي

الموت شافْهَا قْريبَهْ

****

قَلِّي يِكْفِي شِعْفَة وْتُوبَهْ

مرّة أخرى في منّوبة

هَاكْ طْلَعْتْلِي لَهْلُوبَهْ

الموت ريتها قريبة

****

ْيا خُويَا إنْتَ إلِّي بْدِيت

ْيَامَا نْصَحْتِْكْ وْوَصِّيت

ْحْقَرْتْني ..عْلِيَّ تْعَدِّيت

ان شاءالله طْرِيحَة التُّوبَهْ

****

ْمِنْ وقْتْها قَلِّي يا فْلان

نَحْلِفْ وِالْوَقْتْ آذَانَ

ْتَوَّة نْصِيرُوا وْخَيَّان

هذا واقعْ مُوشْ غْريبَهْ

****

ْبالشَّبْعَة يْجِيكْ الجِعَّان

ْعمري ما نعطيه الأمان

ْعيني مفْتوحة يقْظَان

مِتْسَلِّحْ وعْصَاتِي قْرِيبَهْ

****

عبدالستار زرّوقي

10/04/2006

القيروان

تونس