يا والله نهار المحواسة

نهار البارح مشيت نطلّ...نمنّي روحي بمحواسة
قابلني واحد متهنتل...دخّل في عقلي هلواسة
تهمتني بالـ(بورطابل..وشهّدت عليّ العسّاس
لاعملت يدّي لا رجل...عملتلي تهمة حسّاسة
***************
روّحت نبكي كطفل...دموعه على خدّه ملاّسة
هارب ينقّى بالظّلّ... من الشمس يبعد راسه
صرت متكتّف بحبل...ماترفعني حتّى بلاصة
أحسن ليك يا رجل...كان القبر وخلاصه
***************
وحدي رفعت الحمل...تضربت عليّ حراسة
بعد العز ريت الذّلّ...طهري تحوّل لنجاسة
قعقعت ,طحت كجمل...بعد السّهم جاته رصاصة
قالت لي نظرات الكلّ..."الحديد يجي في مقياسه
***************
بدات تقيس وتفصّل...ناسها صاروالي لبّاسة
جماعة تربط وجماعة تحل...جماعة تحضّر في أكياسه
وللّي كان في قاع سطل...صار يدلوحلي في راسه
قال" ما يكون (البورطابل)...كان عند هالنزاسة
************
قريب الوضع يتحوّل...المشكل ولاّلي سياسة
وعلى شنوّة هذا الكل ...رجليهم فيّ عفّاسة
إلّي ريحته كرد بصل...صار مقدّم للرّياسة
يا جماعة يلزمها حلّ...قبل ما توفه الدّراسة
************
راك صحّيت يابطل...مايرضاك الحمار حلاسة
هاو حتّى من البغل...ينطق بحكمة وكياسة
إلّي رشّيته بالفلّ...حفرلي حفرة دهّاسة
طعمته شهد مع عسل...رجّعلي قطران في نحاسة
************
وزنته كيلولقيته رطل...أعطيته شي مو قد قساسه
عطري ردّوه خلّ...القارورة ولاّتلي طاسة
نستاهل لسعان نحل ...لاش رجوعي لها البلاصة
وإلاّتكتيفة بالتّلّ...ولا نعيش عيشة خمّاسة
************
ربطلي عقدة بلاشي حلّ..حفرلي وغرّق في ساسه
كبس وقرّط الحبل...وشهر في وجهي فاسه
هاو طلع هاو نزل ...ضرب أخماسه في أسداسه
نادى المدير والكلّ...وزاد شهّد عليّ ناسه
***************
"اسمعوا ياناس الكل ...أنا جيته بالسّاسة
إمّا يمدّ البورطابل...وإلاّمركز الحرّاس
كلّمته..نقّز وجفل ...شواطينه صارت وسواسة
زراق..حمار وعليّ هبل...كشّر أنيلبه وأضراسه
***************
بحث,داروالنّاس تطلّ...هذا كتاب مع كراسة
ناقص كان أكداس رمل...يجيبلهم خدّامة وردّاسة
دوّر بيّ طفلة مع طفل...طلّع تهم بالأكداس
الحكاية لازمها حلّ...ولو بقصّان الرّاس
***************
سألت عليه ملل ونحل ...جرابة..همامة وقفاصة
تونس,بنزرت ونابل ...صفاقسية,قراوة و(سواسة
كل واحد لفمّو حل...مالقاووشي صحّة راسه
دماغه مضروبة بقفل...سبتة مقفولة بحياصة
**************
روّحت خيط مع حبل...لاعندي قوّة لاحماسة
دمعي على خدودي سايل...نلعن في يوم المحواسة
صلّيت لربّي نبتهل...ربّي يعطيني خلاصه
سبحانه ياطالع على الكلّ...ما يبغي الظلم لناسه
***************
تأوّهت والدّمع نزل...دعيتله بهمّة وإخلاص
رجلي على الجمر تنزل...الظلم يحسّه كان ناسه
في لحظة البشر هلّ...تكشف لي الظالم وأرجاسه
كيف روّح لداره يطل...لقى البورطابل عند ناسه
***************
النّدم صار فيه يسل...ضرب كفّه ودنكس راسه
بسرعة ضربلي تلّ...يجري شقّ الكيّاس
"سامحني التّهمة باطل...اسف سبّبت لك تعاسة"
الواحد في المستقبل...عيوني عليه عسّاسة
***************
من بعد الغلط ما وصل...قريب تجيني على الرّاس
لانخالط قرع ولافجل...لانعمل من روحي مداسة
الماء على الزرع همل...ما يفيده فزع الحبّاسة
لاالواحد يغلط ,لايزل...لايجبد حديث بزناسة
***************
وقت الشدّة والوحل...كل واحد تظهر ناسه
روّحت بزكرة وطبل...غنّاية,زغاريد وعرّاسة
محال يلمنا محفل ...في حضورو نخلّي البلاصة
عيني عليه ما تغفل...ومنامي منام العسّاسة
***************
نكتب فيه شعر مدلّل...لأحفاده يبقى خلاصة
وبيه نفوز على الكل...نفتّح العيوني النعّاسة
قالولي منّك الفضل...منّك العقل والكياسة
سامح وما فمّة زعل...منّك الحكمة والرّياصة
*************
"يا جماعة طلبكم تقبل...المراكب ليها ريّاسة
توّة نبعد عليه نفلّ...لمّيّة تنخرله ساسه
لوكان عملهالي راجل ...قلبه يطلع من أقفاصه
نخلّيه يقعقع كعجل...ونزيد نقلّعله أضراسه
***************
ناصر زيتوني/القيروان