سي عمّار في الكاط سون كاط

سِي عَمَّارْ الكَاطْ سُونْ كَاطْ

سِي عَمَّارْ الكَاطْ سُونْ كَاطْ ......حَارِمْنَا مْنِ الأَنْتَرْنَاتْ

هَاهُو جَا .....جَانَا طَايِرْ كِي عْجَاجَة

لايَعْرِفْ فَرْحَة لاَ هْنَا......اللِّيلَة حْذَانَا يْحِبْ يْبَاتْ

جِيتْ نْكُونَاكْتِي .....قَالَّي شْبِيكِي تْحَرّكْتِي

لاَ تَنْسِي كِي تْرِي مَارِكْتِي ....وَحْدِكْ شِدِّي الفْرَانَاتْ

حَلِّيتْ البَاجْ .....نْفِشْلِي رِيشُو كِيفْ دَجَاجْ

يْرَاقِبْ الجَامْ وِالبَرْتَاْج ....وْلاَيْ زِيمَاجْ مْتَاعْ البْنَاتْ

كُلْ مَا انْدُورْ.....نَلْقَاهْ عَامِلْ دُومِي تُورْ

يُوْقِفْ يْسَكِّتْ المُوتُورْ.....يْشِيخْ عْلِيَّ بِالسَّاعَاتْ

لاَحَبْ يِفْهِمْنِي.....لاَيْحَاكِينِي لاَيْكَلِّمْنِي

لَكِنْ بِعْيُونُو تَاهِمْنِي .....بِينْ يْدِيهْ كُلِّ المْقَصَّاتْ

آشْ يْحِبْ؟.....دَوَّخْنِي شُفْتْ العْجَبْ

رَكِّبْلِي سِتِّينْ عْصَبْ.....وَلَّى ظِلِّي وِلَاّ فَاتْ

نْشَرْشِي ونْعَاوِدْ....دِيمَة يْطَلَّعْلِي "نُوتْ فَاوْنْدْ

يَا وْخَيَّانِي شَيْ يْفَدِّدْ.... فَرَّغْلِي كُلِّ الصَّفْحَاتْ

مِنْ غِيرْ سْبَبْ .... يُرُوفُزْلِي كُلْ طْلَبْ

 مَانَهْوَى قِلَّة الأَدَبْ....غِيرْ نَبْحِثْ عَ الحُرِّيَاتْ 

فِي كُلْ دَارْ.....نْحِلْ البَابْ نَلْقَى عَمَّارْ

يِسْبِقْنِي قْبَلْ الزُّوَّارْ....يْقُلِّي السَّهْرِيّة وْفَاتْ

سَيِّبْ صَالَحْ يَاعَمَّارْ.....لاَ تْعُومْ عَكْسْ التَّيَّارْ

خُوذْ العِبْرَة مِلِّي صَارْ.....لاَ تْهِزِّكْ بَحْتْ المُوجَاتْ

لاَ تْسَيِّبْ هَبْلَة.....وْلاَ تِمْسِكْ فِي يْدِيكْ طَبْلَة

تْحِبْ تْرُدّ الظَّهْرَا قِبْلَة......بِمِزْمَارْ وْعَزْفْ النَّغْمَاتْ

عبدالستار زروقي

 2012_5_31


الهاتف
+21626485378