ياربّي باركلي فيهم

 إِنْتِ وَالله غَاْلِيَة عْـلِـيَّ 
=============
إِنْتِ وَالله غَاْلِيَة عْـلِـيَّ / أُمِّي يَا خِيرْ هْدِيَّة

بِاللِّي نْقُولْ فِيكُ شْوَيَّة / لاَمِنَّة مِنّْي لَامْزِيَّة

أُمِّي يَالْحَافْ يْغَطِّينِي / بِحْنَانُو كْثِيرْ يْدَفِّينِي

انْتِ وِالله قُرَّةْ عِينِي / تَحْتْ جْنَاحِكْ عِيشْتِي هْنِيَّة

لَوْ كُلِّ النَّاسْ عْلِيَّ تْرُوحْ / وْرِيحْ الغَدْرْ مِنْهُمْ تْفُوحْ

وْجُودِكْ وَحْدُو يْدَاوِي جْرُوحْ / يَا دْلِيلِي فِي كُلّْ ثْنِيَّة

لَوْتْسِيلْ قَطْرَاتْ دْمُوعِي / وْيِنْزِفْ قَلْبِي بِينْ ضْـلُوعِي

لِيكْ وَحْدِكْ  يْكُونْ رْجُوعِي / تْنَسِّينِي مَا كَانْ بِيَّ

مَامَا يَا عِزْ الغَوَالِي / يَاأَجْمِلْ كِلْمَة عْلَى بَالِي

بِينْ احْضَانِكْ نَنْسَى حَالِي / هْمُومِي الكُلْ تْوَلِّي مِنْسِيَّة

صُوتِكْ هَمْسَة عِنْدْ مْنَامِي / مَايُوصِفْهَا طُولْ كْلَامِي

صُورْتِكْ مَرْسُومَة فِي احْلاَمِي / فِيهَا نْرَى  الدُّنْيَا وَرْدِيَّة

يَارَبِّي بَارِكْلِي فِيهَا /  آشْ تَسْوَى حْيَاتِي بْلاََ بِيهَا

خُوذْ مِنِّي الصَّحَّة وَاعْطِيهَا / تْعيشْ لاَ سَوْ ..لاَ سْوِيَّة

الشّاعر

عبدالسّتّار زرّوقي

القيروان
+216 26485378