اليوم كملو الاعوام العشرة.

اليوم كملو الاعوام العشرة........و في جاشي هاجت الذّكرى

على رحيل طيّبة العشرة.........البارح واليوم و بكرة

 أمّي هي مثيل الشّجرة........ هي النّخلة ومنها التّمرة

مهما تعدّوا عليّ أيّام.......ومهما مرّوا عليّ أعوام

في قلبي ليك طيب مقام......نا غرسِكْ و خيار الثّمرة

في كبري انا محتاجك ......مثيل صغير يراجي علاجك

فوق راسك درتيني تاجك.......لا ترضِي تلاغيني غبرة

وين أيّامك آه يا (حليمة)....... والبسمة على فمّك ديما

كنت لي حكيمة و فهيمة.......تواسيني من أوّل نظرة

عمرك مارضيتيلي مضرّة......يا مدخلة على قلبي مسرّة

تمدّي الحلوة ..تخبّي المرّة.....بيك جروحي تشفى و تبرى

لا عمري شقيت بدعواتك.......ويديك اللّي تمدّوا في صلاتك

ياما نجدوني في حياتك......هم  في ثنيتي حلّوا مجرى

نطلبلك الرحمة يا امّي......ندعيلك بقلبي وفمّي

لا تشيلي في قبرك همّي....لا عمري نجيبلك مضرّة
-----------------------------------------------------
الإهداء/ إلى روح أمّي العزيزة ( ربح زرّوقي)
-----------------------------------------------------
بمناسبة مرور عشر سنوات على وفاتها- رحمها الله -
----------------------------------------------------------
إبنك الذي لا ينساك أبدا / عبدالستار زروقي