ياما نصحتك ماتشتكيني

آشْ لَزْنِي نْحِلْ فِي بَابْ / هْوَاهْ خَلَّانِي نْعَانِي

بَابْ الحُبْ خَدّاَعْ كَذَّابْ / يَا دَاخْلَهْ رَاكْ فَـاِني

مِنْ غَدْرَهْ شَعْرِي شَابْ / تِـبْهِتْ وَقْتْ مَا تْرَانِي
عُودِي كَانْ أخْضِرْ خَلاَّبْ/ وِالثَّمْرة دَانِيَة عْلَى أغْصَانِي
صَرْفِقْنِي رِيحُو الشٌقْلَابْ / طَيَّحْنِي مْعَ التّْرَابْ سْوَانِي

لاَ خَلَّى سِنَّة وْلَانَابْ / نَاكِلْ فِي رُوحِي دَخْلاَنِي

أَلَّفْلِي قِصَّةْ عَذَابْ / وَانَا البَيْ فِي زْمَانِي

فِي بَالِي حَاذِقْ مِصْوَابْ/ والدِّنْيَا وَاقْفَة تَرْجَانِي

رْهَنِّي دَاخِلْ سِرْدَابْ/ لاَ طَلْ عْلَيَّ وْ لاَ جَانِي

حَدِّثْنِي بِلسَانْ مِرْطَابْ / بِدْخُولْ الجَنَّة هَنَّانِي

كْلَامَهْ وِلْبَاسَهْ جَذَّابْ / صَيَّادْ بِسْهَامَهْ غْزَانِي

مَكَّارْ وِالطَّبْعْ غَلَاّبْ / مَاشِي فِي بَالِي يَهْوَانِي

عَايِشْ فِي حْيَاتِي سِنْجَابْ / قَـرَّاضْ لِخْضَارْ السّْوَانِي

خَلاَّنِي فِي بَحْرَهْ مُصَابْ / لَا قْتَلْنِي وْ لَا دَاوَانِي

لاَ نَعْرِفْ مَاكْلَة وْ لاَ شْرَابْ / عَيِّشْنِي عْلَى دُخَّانِي

آشْ لَزْنِي نْحِلْ فِي بَابْ / هْوَاهْ خَلَّانِي نْعَانِي

عبدالستار زرّوقي