طَوَّلْتْ عْلِينَا بِغْيَابِــــــــــــكْ

طَوَّلْتْ عْلِينَا بِغْيَابِــــــــــــكْ *** خْيَالِكْ خَلَّى بُقْعَة كْبِيرَهْ

لَا تَنْسَى تْفَكِّرْ فِي حْبَابِــكْ *** يَامَا ذَاقُوا أَيَّــامْ مْرِيـــرَهْ

حَطِّيتْ القَلْبْ عْلَى أعْتَابِكْ *** وِ العِينْ تْرَاقِبْ و بْصِيــرَهْ

لاَ نِسْمَة هَبِّتْ بجْوَابِــــــكْ *** لاَ طِيرِكْ غَرِّدْ فِي بْحِيرَهْ


نِسْتَنَّى فِي حَضْرَةْ جَنَابِكْ ***  تِتْفَكَّرْنَا بْنَظْرَة صْغِيرَة


وِانْتَ رَاخِي عْلِينَا اهْدَابِكْ ***  وَعْيُونِكْ خَزْرِتْهَا كْسِيرَة

مِنْ يُومْ مَا فَارِقْتْ تْرَابِكْ  *** نْسِيتْ الدَّشْرَة وِالعَشِيرَة 

نْسِيتْ حُضْنِي وْبَطْنِي اللِّي جَابِكْ***خَلِّيتْ كَسْرِي بْلَا جْبِيرَة


مِتْكَبَّرْ فَاقِدْ لِصْوَابِكْ  ***  يَامَسْوَدْهَا مِنْ تَصْوِيرَة


عِيشْ انْتَ فِي حُضْنْ أنْسَابِكْ *** وَانْسَى وِجْهِي وْتَعَابِيرَه


وْكِيفْ تْرَانِي سَكَّرْ بَابِكْ*** وْزِيدْ اسْتَعْوِذْ مْنِ الشِّرِّيرَة


تْعَذِّبْنِي وْنَكْرَهْ عْذَابِكْ *** لَا رِيتْ مِنِّي تَقْصِيرَة


قَابِلْنِي وَاشْرَحْلِي أَسْبَابِكْ *** وِالغَايِبْ لِيهْ مْعَاذِيرَه




عبدالسّتّار زرّوقي

2012/12/15