OKغَيّرنا و ما تغيّرناش

غَـيَّــرْنَا وْ مَا تـْغَـيَّرْنَاشْ === عَـبّـَرْنَا  وكْلَامْـنـَا مَا وْفَاشْ

قـُلّـِي شْنُوَّة اللِّي مَازَالْ === يْخـَرَّجْنَا مِنْ هَذَا الحَالْ

لْسَانْ سْكُوتْنَا زاد طوال === سألونا ما جاوبناش

قلّي شنوّة تغيّر فينا === تغيّرنا و نسينا ماضينا

تلهينا جارالزّمان علينا === تحكمنا بعصابة وأوباش

قلّي شنوّة اللّي غيّرنا === اللمّة زاد ما بعثرنا

فمّاشي واحد ذكّرنا === بتاريخ وماضي ماتنساش

التّغيير غار علينا فرّقنا === ياما كذب وصدّقنا

الميّت مازال يلاحقنا === تقول حييناه ما دفنّاش


قَصِّينَا الرَّاسْ مَانِشْفِتْ العْرُوقْ === حْفَرْنَا وْمَابْنِينَاش الفُوقْ

كِيفَاشْ نِبْنِي وِالمَكَانْ مَحْرُوقْ === عَشِّشْ فِيهْ البُومْ وِالخُفَّاشْ

تْقِلْبِتْ الأَدْوَارْ وْهذا الحَالْ === تْزَيَّفِتْ الأَخْبَارْ وْتْقَلِّبِتْ الأَحْوَالْ

رْقِدْ الخَدَّامْ وْفَاقْ البَطَّالْ === والوَزْغَة لبست ثُوبْ احْنَاشْ

ماندري هالباب وين يهز === ولا هالعركة امتى تتحز

كل واحد بجلمه يزز === داخل في نطيح  اكباش

نا احترت وحار  دليلي === واحترقت الشمعة الضّاوية في ليلي

لاحد كف ولا من سمع عويلي === وزاد الكلام بينهم حراش

كل شي في بلادي واقف === وكل واحد نصب لخوه منادف

كل من يتحرّك عاد خايف === يفقد قيمته يعودما يسواش

ماعاد الهندي لينا يعصّم === طلع شي أقوى فينا مترسّم

كبس على جيوفنا متبسّم === خلّى البلاد عاقر ما تضناش

الفوضى عمّت في كل القسم === كل واحد على عوده يقسّم

بلادهم حبّوها بالإسم === فرحة الطلاّب بسيدهم ماجاش

كُثْرِتْ فـِينَا القـَادَة وِالقـِدْوَة === كـُلِ وَاحِدْ لَمْ حـِزْبَْهْ فِي نَدْوَة

 قَالُوا البْلاَدْ لاَزِمْ تُوقِفْ مِنْ غُدْوَة === وْيْصِيرْ المَوْجُودْ مَا فـَمَّاشْ

كِيفـَاشْ تْحِبُّونِي نِفْهِمْ === وْهُمْ السَّادَة مِنْهُمْ نِتْعَلِّمْ

مِنْهُمْ البَارِعْ كِيفْ يِتْكَلِّمْ === وْفِعْلَهْ مَذْمُومْ مَا يِتْرَاشْ

فِـينْ التّـَغْيِيرْ اللِّي غـَيّـَرْنَا === وْفـِينْ الفَرْحَة اللِّي انْـتَـظَرْنَا

خـْذِينَا مُسْتَقِْلْ البْلَادْ وْسَطَّرْنَا === وِالخَطْ اللِّي رْسَمْنََاهْ مَا تِسْوَاشْ

الفسّاخ يمسح والقلم مايسطّر === والحبار ينز سايل ويقطّر

بطشاشه فوق الورق يتنطّر === راح البياض وتسوّدت الأدباش

كلّ الطّريق تهجر و تسكّر === هواه بريحة الأوساخ معطّر

لاتقدر تمسّي فيه ولا تبكّر === عبدالصّمد ممدود مايصحاش

ولو تعدّيت تلقاه مكسّر === شطر طين والشّطرالثّاني محجّر

أهواله كثيرة وجوّه متعكّر === والباقي عليكم مايخفاش

الجاهل في بلادي صار ينظّر === يتكلّم بالسّاعد ولايفكّر

والفار على القط صاريتعنتر === توم وجيري ألفين واثناش

بلادي كانت عروس تتبختر === رجالها مثل الصّيودة تزهر

لاحد منهم ليها تنكّر === قدّموا النّفوس الغالية قدّاش

واليوم باعها الولد البكر=== لاحشم على أفعاله لاحكّر

واللّي شرى ماعاد يتذكّر === شراها غالية ولاّ بوبلاش

لكن التّاريخ كتب في الدّفتر === هذي بلاد الله أكبر

ياما قلم الكفر فيها تكسّر=== كلّ ماخط عليها مالقاش

بلادي ليها ربيع فيها يزهر === والظّلام اللّي غطّاها ينوّر

وتفوح ريحة ياسمينهاوتكثر=== غصبا عن كلّ جاحد ما يتسمّاش

22_02_2012