ياما نصحتك ماتشتكيني

يَا مْزَيْنِينْ المَوَايِدْ...........كِيفْ كُلْ العَوَايِدْ

تَاكْلُوا بِالشْفَا ...............تَهْضْمُوا بِالهْنَا

بَعْدْكُمْ وَاللهْ زَايِدْ

يَا مْكَبْرِينْ الكْرُوشْ..........بِالكُسْكْسِي وِالعَلُّوشْ

زِيدُوا شْوَيَّة بَبُّوشْ ..........نَامُوا وْمَا تِصْحُوشْ

عْلِيكُمْ اللهْ رَايِدْ

دِيمَة الهَمْ هَمْ ...............هَذَا لْحَمْ وْهَذَا شْحَمْ

لاَشَيْ مِنْكُمْ يِسْلِمْ.........عْلِيكُمْ شِهْدِتْ الأُمَمْ

تِنْشَرْتُوا فِي الجَرَايِدْ

وِانْتُمْ يَا غَلَابَى .............قْدَرْكُمْ تْعِيشُوا فْ غَابَة

بِينْ الأُسُودْ وِالذِّيَابَة..........مَنْعُوتِينْ بِالسَّبَابَة

تْنَصْبِتْ لِيكُمْ المَصَايِدْ

عِشْتُو حْيَاتْكُمْ فُقَرَا ........لَاحَدْ فِيكُمْ يَقْرَا

لَانَاقَة لِكُمْ وَلَا بَقَرَة .............. وَلَافِيكُمْ مْرَا شَقْرَا

تِجْلِبْ لِيكُمْ النَّسَايِبْ

بْيُوتْكُمْ اللّيِ عَرَقْ وْ طِينْ ..... لَاخُبْزْ فِيهَا لَاعْجِينْ

لَافِيكُمْ كـْتِفْ سْمِينْ ....... غِيرْ اللهْ المُعِينْ

بَاعُوكُمْ مِنْ غِيرْ مَزَايِدْ

مَاعِنْدِي لِيكُمْ عَصِيدَة ......غِيرْ نِكْتِبْ لِيكُمْ قَصِيدَة

تْمَنِّيكُمْ بِالحَيَاةْ الجَدِيدَة .......وبالجَنََّة البَعِيدَة

نِلْقَاكُمْ زَمَنِ الشَّدَايِدْ

لَوْكَانْ الحُكْمْ بْيـِدِّي........نَعْطِيكُمْ كُلْ مَا عِنْدِي

وَلَاوَاحِدْ يُوقِفْ لْصَدِّي.......وِتْكُونُوا انْتُمْ التَحَدِّي

نَعْطِيكُمْ وِسَامْ وْ شَهَايِدْ

**عبدالستار زرّوقي

— 

**عبدالستار زرّوقي

2012/02/03