ابن الوطن
ابْنِ الْوَطَنْ عَمَّرْ سِلَاحَه وْ شَبَّرْ / صَوَّبْ عَلَى اهْدَافْهُمْ قُدَّامَهْ
مُحْتَارْ فِكْرَهْ خَاطْرَهْ مِتْكَدَّرْ / يَارِيتَهَا طَلْقَاتْ تِشْفِي غْرَامَةْ
بَالِكْ تِكُونْ هَالْجَالِيَهْ تِتْنَمَّرْ / وْبَالِكْ عَسَاهَا تْعُودْ مِنْ خُدَّامَهْ
يُمْكُنْ تْنُوضِ الطَّاوْسَهْ تِتْبَخْتَرْ / وْقَدْ مَاتِرُدَّ عْلِيهْ طَلْقِ سْلَامَهْ
وْهَاذِي ثَعَالِبْ طَبْعَهَا يِتْنَكَّرْ / زَايِدْ يِنَشِّنْ صُوبْهَا بِعْلَامَهْ
ابْنِ الْجَنُوبَ اصْيَانْ كَانِ امْدَمِّرْ / فِي الصَّيْدْ عَدَّى كَامْلَاتَ ايَّامَهْ
وِينِ الْفَلاَةِ الْقَلْبْ عَاشِ مْسَخَّرْ / الْبِيدْ عِنْدَهْ فِي مَثِيلِ ابْهَامَهْ
يِشْكِي الْخَصَاصَهْ دُونَمَا يِتْذَمَّرْ / نَفْسَهْ عَزِيزَهْ طَايْرَه مْعَ احْلاَمَهْ
عَنْتَرْ إِذَا خَشِّ الصَّحَارِي وَكَّرْ / مِشْكَاةْ تِجْلِي عَ الْمَكَانِ ظْلَامْهَ
كُلِّ الضَّوَارِي فُوقْ مَا تِتْصَوَّرْ / تَخْشَى حُلُولَهْ عِنْدْ سَمْعَ اقْدَامَهْ
لاَ يْهَابْ ذْيبُ و لاَ يْخَافِ ْمزَوِّرْ / حَتَّى الْْأسد يِلْقِي إِلِيهِ زْمَامَهْ
ابْنِ الْجَنُوبِ الْأَصْلِ مَا يِتْغَيَّرْ / رِيحِ الشَّمَالُ ومَا تْهِزِّ خْيَامَهْ
قَبْلِ الرَّصَاصِ مْنِ الْجَعَبْ ايزَيَّرْ / يْوَقِّضِ اللِّي مُرْتَخِي فِي مْنَامَهْ
لاَ يُومْ يَرْضَى بِالَّذِي يِدَّبَّرْ / إِلَّا وْيُدْرِسْ مَرْكَزَهْ وِ مْقَامَهْ
غِيرُو يْهِبْ لِلْقَنْصْ كِالْمِتْهَوَّرْ / عُوضِ الْغَزَالِ يصِيدْ فَرْخَ حْمَامَهْ
عبدالسّتّار زرّوقي
27_11_2014