احرص على وطنك

 قصيدة مشاركتي في المهرجان الوطني للشّعر الشّعبي بالقصرين الدّورة  43

المحور |  الثقافة درع للوطن

الوزن|     بورجيلة مزيود

احْرِصْ عَلَى وَطْنِكْ تْشِعْ انْوَارَهْ/ حَرِّكْ خُمُودْ جْمَارَهْ / وِاسْلِكْ طَرِيقِ الْوَعْيْ تِلْهِبْ نَارَهْ

_____________________

اْحْرِصْ عْــلِيــهْ بَحـْقِـيقَــهْ _________هِبْ  كِالنَّسَايِمْ  خَرَّجَهْ مِنْ  ضِيقَهْ

لَا تَــنْــتَـظِـرْ مَدْحَــهْ  وَلَا تَصْفِيـقَـهْ____وِاعْلَامْ  نَاسِـي  يِـفـْـكـْــرِكْ  بِزْيــَارَهْ

فِي  كــُلِّ  مَحْـفِـلْ كون ضَوْ بْرِيقَـهْ____بَارُود ْ وَاقِـــدْ  لِلْفَـتِـيلِ  شْرَارَهْ

_____________________

حَــرِّكْ بَقَـايَــــا رْمَـادَهْ__________ وُانْفُخْ  نَفَسْ  كْبِيرْ  فُوقِ  الْعَادَهْ

يُمْكُنْ تْهِبْ جَمْرَاتْنـــا الْوَقَّــادَةْ____مِنْ  تَحْتْ  هَامَةْ  رَاقْدَةْ مِخْدَارَهْ

بَابِ الْأَمَلْ  مَفْتُوحْ  كِيفْ  الْعَادَةْ____ازْدُمْ وْ خُشْ غيرْ اكْتَشَفْ اغْوَارَهْ

_____________________

كَوْنِــكْ مُثَـقِّــفْ وَاعِي______اِسْأَلْ وْ لَاحِظْ  كُونِ انْتَ الدَّاعِي

رَمِّــمْ  شُرُوخِي  فِي  جِدَارِ قْلَاعِي____وِابْـنِــي عَـلِيهَا صَوْمَعَة  ومْناَرَةْ

بَـالـِكْ تْـعـَشِّـشْ  فِي  حَرَمْهَا  لْـفـَاعِي___تِحْجِـبْ ضِيَـاءَ الْفِكـْرِ فِي مَغَّارَةْ 

_____________________

اِعْــزِفْ عَلــَى أَوْتَــارِي________وِاشْحَذْ عَزِيمَة  تْزِيدْ  فِي اِصْرَارِي

إِنْ كَانْ لَحْنِــكْ يَعْتَلِــي أَسْــوَارِي_____نْقُلِّكْ ( بْرَافُو) فُزْتْ عَنْ جْدَارَةْ

وِانْ كَانْ حَايِدْ عَنْ مَسَارْ أَشْعَارِي_____يَبْقَى عَلِيهِ الْعَوَضْ وْأَلْفِ خْسَارَهْ

_____________________

قـَــدْرِكْ تْعِيــشْ مْحَــارِبْ________قَدْرِي وْ قَدْرِكْ  نْخُوضْ  كُلْ  تْجَارِبْ

وُسْطِ  الْبَحَرْ نْقُودْ  نَفْسِ  الْقَارِبْ_______نُـثْبِتْ  كَفَاءَة  تَكْتَسِيهَا  مْهَارَهْ

فِي حِينْ غِيرِكْ  تاَهْ  وُسْطِ  مْسَارِبْ___رَغْمِ الطَّرِيقْ  تْقُودْ  صُوبْ  لْدَارَهْ

_____________________

قَـَـلـْمِكْ يْــثِيــرْ فْــزَعْهُمْ_______حَرْفِكْ  رَصَاصْةْ  كَامْنَةْ  فْ مَصْرَعْهُمْ

عْلُوجِ  السِّيَاسَةْ  خَايْفِينْ  تَرْدَعْهُمْ___أَحْزَابْهُمْ  تْهَــابْ حْرُوفَكِ  الْمِــدْرَارَهْ

إِيَّــاكْ لَــوْ فِي يُومْ  اطَّــاوَعْهُمْ ______اتْعُودْ  كِالْمُنْقَــادْ رَهْــنِ  إِشَــارَهْ

_____________________

بَــابِ الْمَصَالِــحْ سِــدَّهْ_____________سَكِّــرْ ثـْــنِيـتَـهْ وِانْ لَــزِمْ  اتْهِدَّهْ

يَاصَاحْبِي  كُلْ  مِنْ  دَخَــلْ  وِتْعَدَّى_____خْيُوطِ  الْعَنَاكِبْ  نَاسْجْةْ  فَ اوْكَارَهْ

هَذَا مَرَضْ انْ  طَالْ رَكِّبْ  فَدَّةْ _______تُحْرُمْ عْــلَـى  الْمغْـــدُودْ  كُلْ  زْيَارَهْ

_____________________

لِــيــنَا عَــرِيقْ ثْــقَــافــَهْ_______وْلِـينـَا طـَبَايَعْ رَاسْخَهْ بـِنْـظَافَــهْ

أَصْحــَابْ مَبــْدَا وِ الــشَّرَفْ وَ اوْصَافَـه____ وْفِـينــَا خُـدُودِ الْــوَرْدِ وِالنَّوَّارَهْ

مَـاهُوشْ سَقْــطِ مْــتَاعْ حَــتَّى نْعَافـــَهْ_______فِي دِينْنـَا الَمَعْرُوفْ وِ الطَّهَارَهْ

_____________________

قـَـدِّرْ أَمَــدْ لِـمـْسَــافَـهْ________زَيْـفِ الْأَمَلْ  وِالْقُـولْ  كُـلْـنَـا  نْـعَـافَـهْ

حَـتَّى الْفَـلَـكْ  لِمْكَسَّرَهْ  مِجْدَافَهْ_____يِغْرِقْ  فْ  بَحْرِ الْبَلَى وَاغْوَارَهْ

عَزْمِكْ  بْلَا  فِعْلِكْ يْعُودْ خْرَافَهْ_______لَوْلَا الْمُحَرِّكْ مَا  مْشِتْ  سَيَّارَهْ

_____________________

نَحْــتَاجْ فِـينَا لْـشَاعِرْ _________ يْكَسِّرْ جِدَارِ الصَّمْتْ لَوْ جَا وَاعِرْ

يَمْلَا جُيُوبِ الْكُونْ فَيْضِ مْشَاعِرْ _______حَتَّى لَوِ الظُّـُلْمْ عَلاَّ َجْدَارَهْ

مِنْ قَالْ كَوْنِ الْبَارْجَةْ كِي( سَاعِرْ) _______فِي يُومْ تُصْبِحْ فِي الْبَحَرْ مُنْهَارَهْ

_____________________

يُطْـلِــقْ عْيــَارْ أَبـْيَـاتَــهْ_________يَبْدَا  الْقَلَمْ  نَزْفَانْ مِنْ دُوَّاتَهْ

يحْكِي عَلَى لَـيَّـامْ  كِي  خَلاَّتــَهْ______مِثْلِ  النَّبِي  فِي  قُومْ  لِيهِ  دْبَارَهْ

نَفْسَهْ  عَزِيزَةْ  بِالنَّجمْ  سَاوَاتَــهْ______يَـنْـقـَادْ  بِيه  الرَّكْبْ  وَقْتْ  اسْفَارَهْ

_____________________

أْبْيَـاتْ تَمْـلَى الشَّارِعْ___________مِثـْـــلِ الْمَرَاكِبْ فِي الْحَـيَا  تِـتْـسَارِعْ

لَوْ كَانْ سَايِـقْ مَرْكَبَـهْ وْ بَارِعْ______كِــيفِ الْحُـفَـرْ اتْـعـَـوَّقَهْ  وِ اشَارَهْ؟

وِانْ  يِلْزْمَهْ  يْكَمِّلْ مَشِي عَ الْكَارِعْ__مَــشْـيَهْ عَلَى الضَّحْضَاحْ  مَا هُو خْـسَـارَهْ

_____________________

يْخَـاطـِبْ بْعُمُـقِ الـنَّــبــْرَةْ_________يكُــونْ  تُــرْبَـةْ  حَاضْنَةْ  لِـلْبـَذْرَةْ

كِـالْغِيـمْ شِعْـرَهْ وِ السَّـمَا مُنـْتَـظْرَةْ_____مِـنْ أَوِّلْ  قَطْرَةْ  تَنْهَمِرْ بِغْزَارَةْ

رَاعِي  يْدَاوِي  شْيَاهْنَا الْمُحْتَضْرَةْ ____يْسَكِّنْ  أَوْجَاعْهَا مَا تْذُوقْ مْرَارَةْ

_____________________

يْعـَلِّـي خْـطَابِ طْـمُوحَـهْ________ يِكْــتِبْ  قَصَايِـدْ  تَــنْـفَجِرْ مِنْ بُوحَـهْ

هَذَا  الْوَطَنْ  مُحْتَاجْ  يِــبْـنِي  صْرُوحَهْ____ وْمَا هُو بْحَاجَةْ  لْسَلْطْنَــةْ وِامَــارَةْ

وَقْتِ  السِّنـِينْ  الْعَاجْـفـَةْ  تْرَى  قَمْحَـهْ_____ مَالِـي  حُقُولَهْ  مُرْتَخِي  بِثْمَارَهْ

_____________________

يْصَرِّحْ  بْخَافِي  فِيضَهْ__________ يُرْسُمْ  مَلَامَحْ  شَافـْـيَـةْ عْلَى مْرِيضَهْ

إِيَّاهْ  يُسْقِطْ  فِي  مَوَاجِعْ  غِيضَهْ___ زَيْـفِ  الْمَشَاعِرْ  يُوعْــدَهْ  بِمْرَارَةْ

كُلِّ  الْخَـلِـقْ  يَحْتَــارْ فِي تَعْوِيضَهْ____الصِّدْقْ  وَحْدَهْ  يْوَشَّــحَهْ  بَامَــارَةْ

_____________________

يْكـُونِ الْوَفَــا وِ الْـقُــدْوَةْ______يْقُــولِ  الْكَلاَمْ  وِ يــنـْــفــَّـذَهْ مِنْ غُدْوَةْ

الشِّعْرْ مَاهُو بِالْقَصِيدَة  فْ  نَــدْوَةْ____يْرِيدْ  مِنَّهْ  فَوْزْ عَنْ  اجْدَارَةْ

يَاصَاحْبِي  الشِعْرْ نُظْمْ  وْسِدْوَةْ____لِلِّي يْقَضِّى فِي اللَّهِيبِ نْهــَارَهْ

_____________________

يُفـْـرُضْ عْلِيهُــمْ ذَاتَــهْ_________ يِجْعَلْ خَلَاصْ النَّاسْ حُلْمَ ابْيَـاتَــهْ

وْلَوْ الْحَيَا بَعْـدِ الْعُمُــرْ فْنَـاتَـــهْ____يْعِيشْ بِكْلَامَهْ فِي الْعُلَا مِقْــدَارَهْ

تِشْبَعْ ضَوَارِي مِنْ بَقَــايَا فْـتَـاتَـهْ____وِالطِّيـرْ هَزْ عْـقَـابْهَا لَاوْكَارَهْ

_____________________

يْدَافِعْ عَلَى لَحْقِيـقَـةْ_____________يْخَلِّيهَا دُومْ تْلَازْمَهْ وِلْصِيقَةْ

تْعُودِ الَحْيُوطْ مِتْفَاهْمَةْ مْعَ اللِّيقَـةْ____حَتَّى فِي كَسَاهَـا تَكْـتَـفـِي بِشْكَارَةْ

وْلَا يْكُونْ رَعْدِ الصِّيفْ قَـوَّى بْرِيقَـهْ____كْـثِيرِ الــدَّوِي مَايْحُطْ أَمْطَارَهْ

_____________________

يْـتَـبـَّعْ خُـطَى لِمْكَاتِـبْ________يِكْـتـِبْ عَلَى مَنْ عَـاشْ عَبْدِ الرَّاتِبْ

يُصْرِخْ يْـدَوِّي يَا رَفـِيقِي يْعَاتِبْ_______ مَمْنُونْ لَوْ يَرْفَعْ عْلِيهْ سْتَارَهْ

يْعَلِّيهْ فُوقِ الْمَخْمَصَةْ  بِمْرَاتِبْ_______ يُمْكُنْ  يْقَاوِمْ الشِّتَا وَاخْطَارَهْ

_____________________

يْكُونْ الضَّرِسْ وِ النَّابْ___________وِيكُونْ الْمَخَالِبْ نَاهْشَةْ الإِرْهَابْ

تُونِسْ بَلَدْ  مَفْتُوحْ لْكُلْ  مَنْ  تَابْ_______فِيهَا  ارْتَدَعْ  وِتْصَلَّحَتْ  افْكَارَهْ

وْغْرَابْ  دَاعِشْ لَوْ نَوَى عْلَى خْرَابْ_______ حَتْمًا عَلِينَا  نَقْطْعُولَهْ  دْبَارَهْ

_____________________

يَبْحِثْ عَلَى  لَحْـقِـيقَـةْ______________يِكْشِفْ  خْيُوطْ  الظُّلْمْ  وِتْلَافِيقَهْ

لَوْ يُسْكُـتِ  الشَّاعِرْ فْ يُومْ  دْقــِيقَـةْ_______يْعِمْنَـا ظَـلَامِ الْمُرْتَشِي وَانْصَارَهْ

مِنْ وَاجْبَهْ يَقْطَعْ عْلِيهْ طْرِيقَهْ_______لَا يْزَوَّدَهْ بُوقُودْ يْضَوِّي  فْــنَارَهْ

_____________________

مِنَّكْ  ضْوِتْ  مْعَانِي______________ وْمِنْهَا  قْرِيتْ الْحُبِّ عَنْ أَوْطَانِي 

كِلْمَاتْ  دَاجِتْ  فِي رُبوُعْ  بُسْتَانِي_______عِطْرِ الرَّبِيعْ  يِتْشَمْ  بِينْ ازْهَارَهْ

نَنْسَى صَرِيرِ الْبَرْدْ  بِينْ  اسْنَانِي_______وِالسَّقْــفِ عَامِلْ  فُوقْــنَا  قَطَّارَةْ

_____________________

دِرْتِــكْ  مَثَــلْ  لِلْأُمَّهْ ______________وْبَاهِيتْ  بِيـكْ  الْفَانْـيَةْ  وْمَافَمَّهْ

عَلْخَاطْرِكْ جَلِّيتْ عْلِينَا الْغُمَّةْ____وْ ِفي دَرْبْ دَرْبِكْ نُزْهْــتِي مُسْرَارَهْ

بَعْدِ النَّبِي  خْــلِيفْـتَـهْ  تِتْسَمَّى _______ وْبَعْدِكْ  حْلَفْتْ  مَا تِضَوِّي انْوَارَهْ

_____________________

بَيَّــنْـتْـلـِكْ مَوْضُوعِي_______وْشَعِّــلْتلكْ فِي الْمَهْرَجَانْ شْمُوعِي

يَاسُلَّمِي يَا مِصْعَدِي وِطْلُوعِي_______يَا نُكْهَةِ  الْمَجْلِسْ وْ حُضَّارَهْ

الْيُومْ عِيدِكْ  يَاشَمْسْنَا  وِسْطُوعِي ____لَوْلَاكْ  مَا  طُـلْــنَا نْعِيمِ حْضَارَهْ

       _____________________

عبد السّتّار زرّوقي