نَفْسِكْ ذَلِيلَهْ وِالطَّمَعْ شَاكِمْهَا

نَفْسِكْ ذَلِيلَهْ وِالطَّمَعْ شَاكِمْهَا /  لاَ قُلْتْ يُومِ انْصُونْهَا وْنِكْرِمْهَا

نَفْسِكْ  يِزِيدِ طْمَعْهَا / كِالنَّارْ تِسْرِي وِالْحَطَبْ مَرْتَعْهَا
عَدَّى الْعُمُرْ مْنِ الْحَيَا تِمْنَعْهَا / لَوْ مَرّه تَصْحَى مِالْحَيَا تِعْدِمْهَا
حَالِفْ عَلَى الْعِزْ يُومْ لاَ تَرْفَعْهَا/ كُلْ مَا تِذُوقِ الْمَفْخَرَة تْسَمَّمْهَا

لاَ قُلْتِ انْرَوَّضْهَا / قَبْلِ الْمَنِيَّة الصَّادْمَةْ تَقْبَضْهَا
انْسِيتْ قَدَّاشْ الزَّمَنْ نَوَّضْهَا / فَمَّاشْ تَنْهَضْ وِانْتَ مَنْ نَوَّمْهَا
اعْقُودْ مَرَّتْ رَاكْشَة فْ مَرْبَضْهَا / حَلْفِتْ يَمِينَ اللهْ مَا تْقَدَّمْهَا

طَبْعِكْ عَلِيكِ مْسَيطِرْ/ أَوْهَامْ تَعْكِسْهَا شْرُورِ اتْقَطِّرْ
يَارِيتْ مَرَّهْ تَلْتَزِمْ وِتْسَطِّرْ/ أَهْدَافْ جَمَّةْ بِالْوَفَا تُرْسُمْهَا
فَمَّاشْ ابْرِيحِةْ وَفَاهَا اتْعَطِّرْ/ اللِّي حَرَمْهَا الدَّهْرْ مَا شَمَّمْهَا

طُولِ الدَّهَرْ عَاكِسْهَا / تَرْقَى عَلَى. اغْصَانْهَا دَّنْكِسْهَا
تَرْمِي ثِمَارَ الْخُلْقْ وِاتْعَفِّسْهَا / وَ اعْرَافْهَا .لِمْسَقَّمَهْ .تُبْرُمْهَا  
لَوْ تَغْرِسِ الزَّيْتُونَ مَا تُحْرُسْهَا / وِانْ تَزْرَعِ ا لأَشْوَاكِ اتَّمَّمْهَا

قَدَّاشْ نَفْسَهْ اتْعِيسَهْ / وْقَدَّاشْ صَبْرَتْ مِنْ عَهِدْ عِلِّيسَهْ
وْقَدَّاشْ ْاتْمَسْخَرْ عَلِيهَا جْلِيسَهْ/كَالَ التُّهَمْ اقْصَادْنَا وْجَمَّمَهَا
كُلْ يُومْ عَايِدْ فِي يْدِيهْ انْقِيصَهْ / عَاشَ الدَُّهُورِ بْكُلَّهَا مَافْهِمْهَا

فِينِ الرُّجُولَهْ ضَاعِتْ / خَشِّتْ لْسُوقِ الْمَسْخَرَهْ وِاتْبَاعِتْ 
حَتَّى ثِيَابِ الذُّلْ عَلِيكُ وسَاعِتْ / فَصَّلْتْ ثُوبِ الْعِزْ مْنِ كْمَايِمْهَا
مَالَتْ خُلُوقِكْ لِلَّعِبْ ومَاعِتْ / طُولِ الدَّهَرْ عَ الْمَرْجَلَهْ فَاطِمْهَا

 فَمَّاشْ تَبْقَى صَافِي/ تَعْرِفْ حُدُودَكْ بِالْقَدَرْ الْكَافِي
لِمْتَى عُيُوبِكْ كِالْوَرَقْ الطَّّافِي / فُوقِ الْمِيَاهِ الرَّاكْدَةّ اتْحَزِّمْهَا
بَالَغْتْ فِي التَّلحيس مَالِكْ شَافِي / إِلاَّ دِيَارِ الآخْرَة وْحَاكِمْهَا

عبدالسّتّار زرّوقي