قَالِتْلِي وَقْتَاشْ اطُّـُلْ

قَالِتْلِي وَقْتَاشْ اطُّـُلْ === وتْعَدِّي السَّهْرِيَّة مْعَانَا
مِنْ شُوقِي وَرْدِي ذْبِلْ === لَحْنَانِكْ أَرْضِي عَطْشَانَة
مْنِ فْرَاقِكْ قَلْبِي تِقـْـفِلْ = مَا عَادْ يْحِسْ بِحْنَانَة
يَامَا الوَحْشْ لِيهْ قـْتـِلْ === صَارْ صَدْرِي لِيهْ جَبَّانَة
والنّـُومْ جْفَانِي ورْحَلْ === خْذَا عْيُونِي عَنْدِكْ أَمَانَة
وْصَالِكْ وَحْدُو هُوَ الحَلْ === يْحَسِّسْنِي بْكَوْنِي إِنْسَانَة

لَوْ نَرجَعْ لأَيَّامْ قْبَلْ === بِالصُّوتْ تـْنَادِي يَا فْلاَنَة
نِزْحِفْلِكْ يَا سِيدْ الكُلْ === مَاعَادْ تْهِمْنِي الإِهَانَة
قُلْتِلْهَا اللِّي حَبْ هْبِلْ === بَاعْ عَقـْلُو مِنْ غِيرْ ضْمَانَة
سَايْسِي رُوحِكْ مِنِّكْ العْقَلْ === الًُّصُّوفْ يِتْبَاعْ بٍرْزَانَة
لاَ تْقُولِي هَاوْ مِنِّي مَلْ === طبْعِي مَا يْحِبْ الخَرْنَانَة
بِينِي وْ بِينِكْ فَمَّة جْبَلْ === رَافِعْ فِي السَّمَا عْنَانَهْ
لاَ قَطْعَاتَه خِيلْ وْ بِلْ === لاَ طَارِتْ فُوقُو سِمَّانَة
لاَ عَفْسَاتَهْ حَتَّى رْجِلْ === شُوكُو مَا يْعَدِّي الحَفْيَانَة
ذَا تْحِبِّي يْدِيرْلِكْ العْسَلْ === عْلِيكْ بِالكِلْمَة المِزْيَانَة

عبدالسّتّار زرّوقي

2012/10/14