وَشْوِشْلِي مَرَّة البَــــــــرَّادْ

قصيدة اللّيلة على البرّاد.....صديقي المفضّل

وَشْوِشْلِي مَرَّة البَرَّادْ

============

وَشْوِشْلِي مَرَّة البَــــــــرَّادْ === مَانِدْرِي وَشْ مِنِّي حَبْ

زَعْــمَة حَاضَرْ في المِيعَـادْ === وِلاَّ يْرِيدْ سُكَّرْ وحْطَـــبْ

وَشْوِشْلِي مَرَّة تْوَشْوِيشَة === قَالِّي زِيدْنِي فِي الَحْشِيشَة

تَـــوَّة نَعْمَـــلْ تْكَشْكِيشَـة === تَاجِي عْلَى كَاسِــكْ يِتْصَــبْ

قُلْتْلَهْ هَا بَرَّادِي وَشْوِشْ === فُورْ عْلَى جْنَابِكْ وْ تَـشْتِشْ

خُوذْ مِنِّي رُوحِي وِانْعِشْ === مَحْـــلَاهَا رِيحْتِكْ تـِتْحَـــــبْ

زِدْتِكْ مْنِ الـَحْشِيشَة حَفْنَـــــة === خَلِّي مَا تَغْمَضْلِي جَفْنَة

بِيـكْ العِيشَة تَحْلَى وْ نَفْنَـــــى === جَمْرِكْ فِي قَلْبِي لَاهِـبْ

آهْ يَا بَـــــــــــرَّاد العِشْـــــرَة === وَحْدِكْ تَحْلَى مْعَاكْ السَّـَهْرَة

كِي نِتْخَاطِبْ نَا وِالقَمْــــــرَة === انْتَ الشَّـَاهِدْ عْلَى المُحِــبْ

تَايِـــــكْ يَاسِرْ دِيمَة عَاقِــــدْ === يُوقِفْ فِيهْ العُـــــودْ القَــــاعِدْ

يِمْشِي النُّومْ عَلَلِّى رَاقِـــــدْ === مَا يْسِيلْ وَقْتِ الْـلّي يِــتْكَبْ

لاَمَرَّة كَاسِكْ شْكَالِــــــــي === نَا وَالله اللّي نِشْكِيلَهْ حَالِي

نتفَرْهِــــدْ ونوَسَّعْ بَالِــــــي === مَاعَـــادِ نْحِسِّشْ بِـغْضَـــبْ

كَانُــونِكْ مَلِّسْتَهْ بِيــــــــدِي === وْحْمِيتَهْ مِنْ نَارْ وِقِيـدِي

انْ شَاءْالله تَبْقَى لَحْفِيــدِي === يِتْفَكِّرْ عُمْرِي اللِّي هْرَبْ

جَمْرِكْ هَبْ اطْشَاشَهْ طَايِرْ === دَارِي عْلَى قَلْبِي وَشْ صَايِرْ

اينَــــوِّضْ مِنْ غِيرْ عْمَايِـــــرْ === يَــامَا اتْلَمُّــوا بِيه حْــضُـــبْ

نَـــــا عِنْــدِي هَذاَ البَـــــرَّادْ === نَسَّـَانِي فِي بَرْشَة عْبَادْ

لَا لَــــفَّـَـــقْ عْلِـــيَّ وْلَا زَادْ === لاَ مَـــرَّة غْدَرْنِي وِكْــــذِبْ

عبدالستار زرّوقي

عبدالستار زرّوقي

10_10_2012