ياتونسي قوم وبكّرOK
ياتونسي قوم وبكّر.......و زيدنا في إنتاج السكّر
خلّوك مهموم تفكر.....هايم والطّريق مسكّر
دمّك ياتونسي محلاه....في القهوة يولّي مبهاه
سكّر من دمّك مأتاه.....انت تنتج وهو يحكّر
ياتونسي خلّوك هايم....ديمة في سكرك عايم
انت على اللّقمة صايم...والسّكّر طالع ويكثر
دمّك سكّر وفمّك مر......ماهو قضا لاهو قدر
انت اليوم بالثّورة حر....والسّكّر منّك يقطّر
دمّك مايعرف (فْرِيقُو)....ولا النّاس بيه يضيقوا
كل واحد مع فَرِيقُو.....شكون يشرب منّك أكثر
هذا شكارة وهذا كاس....يعبّوا في رحيق ألأانفاس
لاخر يحفرلك بالفاس.....يردمك وعينك تخزر
ياتونسي قوم وبكّر.......و زيدنا في إنتاج السكّر
--------------------
عبدالسّتّار زرّوقي
2012/01/26