♡" يازائر القيروان"♡

ماهو هكّة يامواطن

===========

يا شعبي مْشاتْ الشُّعَبْ === بربّي قـلّي آش تحب

كل مانزيد خطوة لقدام === معاها يكثر الطلب

يا شعبي احترت فيك === أمّك تونس تناديك

هرب الدّكتاتورعليك === لقاتك عوضو منتصب

ياتونسي ماخفت عليّ === قول بلادي أولى بيّ

مهما طال صبرك شويّ === قدّام ظلم اللي هرب

فرّحني تفرح الأوطان === خيو تي بلاد العربان

نبغي نحرّر كل إنسان === نرجّعلو كل ما تسلب

شعوب هديتلها الحرّية === يا محرّرها في كل ثنيّة

اللي ما ذاق الدّيموقراطيّة === صار يختار و ينتخب

بين الناس انت القدوة === أنت اليوم وأنت الغدوة

ليك في كل المحافل ندوة === ميعاد تتويجك قرب

ياشعبي دير بالك === لاتسير في هذي مهالك

لايغرّك بعض عيالك === مايحبّو أمنك يستتب

اللّي يحطّوا العصى في العجلة === يحبّوا ديمة بيهم البجلة

هكّة تسير الأمور مرتجلة === يعتصموا على أتفه سبب

ماهو هكّة يامواطن === يالّي فوق ترابي قاطن

نحبّك ديمة فايق فاطن === للّي يديرو الشّغب

وانت يا للاّ الوزارة === خذيت الكرسي عن جدارة

طلّع راسك من العمارة === راهو وفى وقت اللّعب

لاالفوضى..لاالإعتصام === أنت قوتي ياخدّام

فرض عليك الإحترام === شمّر جا وقت التّعب

بالإنتاج والإنتاجيّة === يالّي اطّالب بالشهريّة

ماكش انت الضّحيّة === انت دايا وانت الطب

**عبدالسّتّار زرّوقي

2012/01/17