باب الجدي تركته مسكّر

(جَدْي)السّيد سوغان:

__________

باب الجدي تركته مسكّر/كتبت عليه هذي العبارة

"انتبه هذا مُعسْكرْ/ مِنْ قَرِّبْ تْصيبهْ شْرارة"

ما زلت نعاني ونتذكّر/ الجَدْيْ اِلْ شَبِّتْ فيّا نارهْ

فكري مْنِ صْياحهْ متعكّر/والصّدر اللّي فاض حْكارَهْ

لا تربّي الجدْي المتْنكّر/على جميلك هبّطْ سْتارة

تْناسى كي نْمسّي ونْبكّرْ/سْنِدْتَهْ وقت اِلْ طاح جْدَارَهْ

واليُومَ في بيتَهْ وكِّرْ/نْعتْلي بيتي بالمغّارة

يْسبّق المُرَّة عَ السّكّرْ/حرقْلي زرْعي حين خْضارة

لا حاجتي بيه ولا نْفكِّر/كْرهْت تْبعْبيعهْ ومزْمارهْ

دماغهْ مْفرْيِسْ زيد مْهكّر/وهو يْقُلّي شوفْ الفارة

عقب اللّيل يقوم يزكّر/عاملّي عركة وْحُبارة

من غدوة عالفجر نْبكِّرْ/نهز نْبيعَهْ للجزّارة

هذا جزاء اِلْ ما يفكّر/تربيتي في الجدي خسارة

لا خداع اللّيلة ولا مكر /نُومي هاني بْلاشي غارة

#عبدالسّتارزرّوقي