ياما نصحتك ماتشتكيني

يَحْكِيوْ عْلَى فَنْ اليُومْ ===  قلْتِلْهُمْ سَعْدِكْ يَا لَطْرِشْ

لاَكْلَامْ ..لاَلَحْنْ مَفْهُومْ === انْتَبَّعْ فِي الغُرْزَة ونْفَتِّشْ

سْمَعْتْ نْهِيقْ وْصُوتْ البُومْ === كُومِيكْ وشْعَرْ مْنَتِّشْ

كِي نْشُوفْ الصُّورَة بالزُّومْ === عْلَى الشّاشَة يُظْهُرْ المْنَمِّشْ

فِي السَّاحَة كِيفْ دِيكْ الرُّومْ === يُنْفُخْ فِي رِيشُو وْيِنْفِشْ

مُوسِيقَى وْأَدَاءْ حْمُومْ === يَا سَامَعْنِي لَالَا تِدْهِشْ

السِّيكَا فِي مْقَامْ المَزْمُومْ === وِالصُّوتْ ذَابِلْ وْيُرْعِشْ

بِضَاعَة رْخِيصَة فِي السُّومْ === عَالبَاهِي نْلَوِّجْ ونْفَتِّشْ

لاَ نِسْمَعْ الفَنْ المَذْمُومْ === فِي وِذْنِي يْفَرَّخْ ويْعَشِّشْ

ناري على فن اليوم === صار منّو الكل يتمعّش

برّاح والصّوت مزكوم=== يقول يغنّي وهو يمعوش

تحت الشجرة يفرش مرقوم === يحيّر الارض ويربّش

كاللّفعة ينفث في سموم === والسّامع في جلدو ينهش
خبّي صوتك عليك اللّوم=== الحديد الحافي ما ينقش
واللّي طايح من السّلّوم === يشوف قهيوة فيها يركش
لايدز فيها مظلوم === لا يقدر يجرح ويخبّش

نمشي انّنّي جاني النّوم === مافمّة في السّهرة ما ينعش

نحلف على الفن نصوم === لِلْمَاضِي نَبْقىَ مِتْعَطِّشْ

الآهَاتْ مِنْ أُمْ كَلْثُومْ === فرِيدْ عْلَى عُودُو يُنْقُشْ

حَلِيمْ حُبِّي المَكْتُومْ === نجاة والنّبرة اللّي توشوش

فيروز على صوتها نقوم === عليّة  تْصَّحِّي المْحَشِّشْ

اكتوبر 2012_04