زْغَارِيدْ وْ زُكْرَة و طْبَلْ

قـَدِّكْ يَامَا حْيَا وقـْتِلْ

===========

زْغَارِيدْ وْ زُكْرَة و طْبَلْ === الدَّرْبُوكَة عَامْلَة بِعْمَالْهَا

عْرُوسِتْنَا مْنِ الجِحْفَة إطُّلْ === تُحْرُسْهَا صْنَادِيدْ رْجَالْهَا

نَوَّرْتِ وْ زَانْ المَحْفِلْ === يَا ضَوْ القَمْرَة و هْلاَلْهَا

شَرّفْتِ والبَدْرْ كْمِلْ === وِالصَّحْرَا فِرْشِتْ رْمَالْهَا
 

فِي عُرْسِكْ نُرْقُصْ مَا نْمِلْ === مْنِ شرُوقْ الشَّمْسْ لذْبَالْهاَ
 

يَاشَهْدْ النَّحْلَة يَا عْسَلْ === يَاتَمْرْ النَّخْلَة وظْلاَلْهَا
 

بِجْمَالِكْ فـُزْتِ عَالكُلْ === (المُونَالِيزَا )مِنِّكْ خْصَالْهَا
 

مَاحَازِتْ حُسْنِكْ مْلِلْ === وْلَا تِقْدِرْ تْبَدِّلْ أَقْوَالْهَا
 

البَرْقْ مْنِ التـَّبْسِيمَة وْصِلْ === ضَوَّى عْلَى الدِّنْيَا بِكْمَالْهَا
 

قـَدِّكْ يَامَا حْيَا وقـْتِلْ === شَرِّدْ القـْبِيلَة بِرْجَالْهَا
 

لَا خَلَّى طُفْلَة وْلَا طْفُلْ === لِلْيُومَ هَذَاكَة حَالْهَا
 

قَدَّاشْ حْسِدْتِكْ يَاجْمَلْ === عْلَى ظَهْرِكْ هَزِّيتْ حْمَالْهَا
 

لاَ نَابْنِي كِيلُو لاَ رْطَلْ === لاَ تْشَرِّفْ صَاعِي بِكْيَالْهَا
 

يَا رِيتْ الميزان عْدِلْ === سَوَّى الكَفََّة مْعَ عَدَّالْهَا
 

الزَّرُّوقِي صَيَّادْ جْبَلْ === لاَ يْهَابْ خْـــنُقْ وْ لاَ نْبَالْهَا
 

قُدَّامْهَا زْحِفْتْ كِي وْرَلْ === لاَ خُلْصِتْ رُوحِي مْنِ حْبَالْهَا
 

مَلْعُونْ الحُبْ اللِّي يْذِلْ === مَرَّغْنِي فِي تْرَابْ أَوْحَالْهَا
 

لاَ عَادْ نْسَكِّرْ لاَ نْحِلْ === مِفْتاَحِي تْكَسِّرْ فِي أقْفَالْهَا
 

نَوَّارِي بِلْهِيبِكْ ذْبِلْ === كَانْ مَالِي وِ شَمْسِكْ مَالْهَا
 

شيّبتِ شَعْرِي ونْسِلْ === حَتَّى اللِّحْيَة حْرَاقِكْ طَالْهَا
 

عبدالسّتّار زرّوقي

20/9/2012

— 

عبدالسّتّار زرّوقي

20/9/2012