يَحْلِفْ لَا نَاضَتْ رْصَاصَة

يَحْلِفْ لَا نَاضَتْ رْصَاصَة / وْ لَا تَرْكِتْ أَمَارَة وْ لَا بْلاَصَة

المَوْضُوعْ بْكُــلـُّو إِشَاعَة / الشَّعْبْ نِسْبُو لِلْقَــنـَّاصَة

لَحْـكَايَة الكُلْ فِي الثَّوْرَةَ / خَرْجِتْ كََرْطُوشَة حَوَّاسَة

هِجْمُوا عْلِيهَا أَوْلَادْ الحُومَة / تـْـلـَمُّوا فُوقْ مِنْهَا كَدَّاسَة

جْرَاتْ بِينْ زَنْقَة وِالدُّورَة / لَا كَانِتْ لِيهُمْ مَسَّاسَة

ضَرْبُوهَا عَالعِينْ العُورَة / بَاتُوا عْلِيهَا رَدَّاسَة

جَرْحُوهَا بَاتِتْ مَغْدُورَة / وْهِيَ اللِّي عْلِيهِمْ عَسَّاسَة

وِالقََـتـْلَى مْلَاوْ السَّبُّورَة / تْمَسْحُوا بْـلـَمْسَةْ مْنِ الطَّـلاَّسَة

ثْلَاثَة مِيَّةْ رْصَاصَة شْهِيدَة / مْعَاهَا اللِّي جْرُوحُو حَسَّاسَة

طَـلـْـقـُوهَا وْ قَطْعِتْ تَنْهِيدَة / نْكَرْهَا سْلَاحْ الرَّبَّاصَة

حْكَايِتـْـنـَا عْلَى رْصَاصَة مَظْلُومَة / مَسْـنـُودَة بْوَرْقْ السِّيَاسَة

وِالأُمْ اللِّي صَبْحِتْ مَكْلُومَة / مَانْصَفْهَا حُكْمْ الرِّئَاسَة

عبدالسّتّار زرّوقي
2012/7/27