لاتعملّي روحك ناصح === وتغفل عن عملك الفاضح
لاني واحد مثلك طايح === قدّام دارهم ماشي رايح
قالب ثلج فيها سايح === لاتهمّك بخسة لاطرايح
لكن أنا عرفي قادح === نشعل في القادح والمادح
لانعرف في شوري مصالح === لابلقاسم لاعم صالح
تشربني تلقاني مالح === تاكلني كي التّمر البالح
حدّثتك بالصّوت الصّادح === عطر الصّدق منّو فايح
استكقى بروحك وتصالح === مع نفسك وكلّ الجوارح
كثير اللّغو ماهو فالح === كلامه كيف الطّير السّابح
طاير في الهوا يتلاوح ===في الأرض مكنوس بمصالح
خيار بنادم ماهو طالح === كيف اليوم كيف البارح
كلامو لايلعب بدراجح === لايسقط في الخطئ الفادح
ماشي على المبدأ ناجح === لايبيع ريح ولامراوح
لايهمّه في الكلب النّابح === لايعمل عسّة ولاسارح
هاو ماشي في الدّنيا طامح === لاتغرّو زينة الملايح
لاهو شاكي لاهو نايح === لاعيونه تبحلق في سوايح
عايش بين النّاس واضح === يزرق كيف القمرة فارح
فهمتني يالّي جايني مايح === تلقاني نقرّيك وشارح
شقولك في هذي نصايح === موش خيرلك من برشة طرايح؟
2012/4/22
2012/4/22