مازال فينا الخير

 ماَزَالْ فِينَا الْخِيرْ مَهْمَا تْعَدَّى === لَايَقْطْعَهْ الغْيضْ ولَا مِنْ يْشِدَّهْ
 سَاكِنْ فِي قُلُوبْنَا حَتَّى نَدَّى=== يِسْرِي فِى عُرُوقْنَا لَامِنْ يْسِدَّهْ
لِلِيُومْ مَافَارِقْنَا سْنِينْ وِمُدَّهْ === نْقَاتِلْ مْعَاهْ الشَّرْ ّرَدَّة بْرَدّّهْ

مَازَالْ فِينَا شْكُونْ يْسَايِسْ   === يْسَاعِدْ المُحْتَاجْ وَقْتْ النّـَـقـَايِصْ
يْـشِيلَهْ مْنِ الفـَقـْرْ وِالْخَصَايِصْ === يُرْسُمْ عْلِيهْ البَسْمَة وِالوَرْدَة

مَازَالْ فـِينَا الخِيرْ فِي كـُلِّ البَلاَيِصْ=== وْمَازَالِتْ المَرْكـَبَة تْسِيرْ بْرَايِسْ 
وِنْ غـِلـْبِتْ عـِينِيهْ حْدَى النّـَعَايِسْ === عِـنْدْنَا المْـقُودَة تـْفـَـيـْـقَهْ وِتْرُدَّهْ

مَازَالْ فِينَا شْكُونْ يـْهَدِّي      === يْلَطِّفْ الجَوْ المَشْحُونْ المِتْرَدِّي
يْخَـلـِّي الضّْعِيفْ يُوقـِفْ نـّدِّي === يـُنْصُرْ الحَقْ وْلَا يْكُونْ ضِدَّهْ

مَازَالْ فِينَا لـِكـْبـِيـرْ يـِتْحَكـِّرْ       === وْمَازَالْ هُوَ مِنْ يْحِلْ وِيسَكِّرْ
يـْوَظِّحْ لِينـَا طْرِيقـْـنَا وِيسَطِّرْ     === وْكـُلْ وَاحِدْ فِـينَا يِلْزِمْ حَــدَّهْ

حْــنـَا نْعِيشْ بـْـتـَارِيخْ  جْدَادْ نَـا   === تـَارِيخْ نـَوِّرْ فِي ظـْلاَمْ سْوَادْ نَا
مَهْمَا نـِسِـيـنـَاهْ وِكـْثـُرْ عـْـنَادْ نَـَا=== نـَلـْـقـَاهْ فِي تـَعَـبْـنَا تَحْتْ الرَّاسْ مْخَدَّة

تـَارِيخْـنـَا وْمَاضِينَا لاَمِعْ نَايِرْ  === يَامَا غـِرْقـِتْ مْرَاكِبْ وْهُوَ بَاقِى سَايِرْ
مَازَالْ كِـالـْفـَلـَكْ فِي مْسَارَهْ دَاِيرْ      === لاَ نَجْمْ  يِتْخَطَّاهْ  وْلاَ بَصَرْ يْحِدَّهْ

مَازَالْ فـِينـَا حُبْ الوَطَنْ وِالنـَّغـْرَة === وِالفـَزَّة وِالفـَزْعَة وْسَدَّانْ الثـَّغْرَة
لاَ نـِقـْبـِلْ تْعِـيشْ بْلَادْنـَا فِي وَغْرَة === وْلَا تـَرْجَعْ لـْفَصْـلْ الفـِتـَنْ وِالرِّدَّة

حْـنـَا نِبْنِي الوَطَنْ الوَاحِدْ === يـِدِّي فِي يـْدِيكْ يْكُونْ  العَاهِدْ
عَمْـلِي وِعَمْـلِـكْ عـْـلِينـَا هُوَ الشـَّاهِدْ === يُحْـكُمْ بـِينـَاتْـنَا وَقْتْ الهَـدَّة
 
ْكُونْ مُسْـلِمْ ..يْسَارِي..وِلّاَ مُـلـْحِدْ === كـُونْ مَاتـْحِبْ إِلاَّ جَاحِد
كـُـلْ وَاحِدْ  فـِينـَا لِإِلاَهُو سَاجِدْ=== لـَكِنْ  تـَبْـقىَ بِـيـنَّا دَايْرَة  لِمْـوَدَّة

مَازَالْ فِــينـَا الخِيرْ مَهْمَا تـْعـَـدَّى === لَا  يـَـقـْـطَعـَهْ الغـِـيضْ وْلَا يْشـِدَّهْ
سَاكـِنْ فـِي قـْـلـُوبْـنـَا حَـتـَّى نـَـدَّى=== لِلـْيـُومْ مَا يْـفـَارِقـْـنَا سـْـنـِيـنْ وْمُدَّة

الشّعر/عبدالسّتّار زرّوقي
القيروان