يا قاطع الابحار

يا قاطع لبحار  ====  وين رايح لبعيد
قلبي عليك محتار ==== قاتلني التـّنهيد

تتركني وتتغرّب ==== فوق لوح مخرّب
والمركب يتسرّب ==== منّو الماء صديد

ولدي ..البحر مايواسي ==== حكمو علينا قاسي
ياما شرّد ناسي === وزاد في التـّشريد

 هذا البحر غدّار ==== وموجو الهدّار
ياما خلا ديار ==== من غير مواعيد

يا ولدي لاتحرق ==== ولا تشيّبلي مفرق

خوك توّة يلحق ==== تخلّوني وحيد

ولدي بلادك أولى === بيك من كل دولة
القسم بيد المولى ====عليك رزقك مايحيد

أمّيمتك فيك تكبّر ==== وانت ترمي للبحر
ليش فيها ماتفكّر ==== فكّر لاتكون عنيد

لاتحرقلها كبيدة   ==== نواحها بالتّرديدة
تبكي لأيام عديدة     ==== ولاتفرح بعيد

وليدي هذي نصيحة ==== منّي ليك مليحة
لا اطّيّحنا طيحة      ==== وانت وما تريد

اسمع وليدي كلامي ==== انت ذخري في ايّامي
لانطوّل في ملامي   ==== ان شاءالله ليك يفيد

عبدالستار زرّوقي

07_03_2012