ما عاد نكتب فيك ولا قصيدة

ما عاد نكتب فيك ولا قصيدة
========================
ما عاد نكتب فيك و لا قصيدة
خلّيك على ما فعلت بي شهيدة
ما عــــــاد نتغنّى عليك بشعري
و لا ننشـــره بين يديك كالجريدة
خلّيــــك عارفة مهما كان عندك قدري
نتفكّرك تشعل في الجاش وقيدة
نتفكّر كيف قضّيت في حبّك عمري
ونتفكّر السّهر تحت القمر لأيام مديدة
نتفكّــــر معـــــــاك أيّامي و صغري
وكيف كنّا نقضّي معا سويعات سعيدة
هــــاذي كلّ الأماكن تشهد عليّ وتدري
أنّي أروح ألثمها وقت ماتكوني عنّي بعيدة
وأفضل لحين أحاكيها في سرّي و في جهري
ويفضل الصّدى يواسيني بالتّرديدة

والله حرام عزمت والرّحيل بدري
تركت جرحي دون الشفاوالتضميدة
وزادت عليّ جمرات الدّمع من نظري
و زادت عليّ في الحشا التّنهيدة
أخــــــاف يوم لو ينقل القوم خبري
مــا تعرفي بالأمر وانت عروسة جديدة
أطلب من الله يزوّدلي في صبري
أصل الرّوح ليك خفّاقة و عنيدة
و ظلّك صارمعي وين ماأسري
لاحقني زي ما يلاحق السّلوقي طريدة
و كــلّ الكلام الي بيننا في صدري
و كـــلّ ما شفناه في الأيام الشديدة
لا زالت تهذي بيك روحي وفكري
ولازلت أذكر مقامك في قصايد عديدة
أستحلفكم ياقوم لا تزهقوا من أمري
أصـــل الداء منبته بنت فريدة
*عبدالسّتّار زرّوقي
القيروان
تونس