في زماني ضاع الحب

-----------------
في زماني ضاع الحب
في زماني تحوّل لكلب
سوق حامي تنصب
إلّي تشكي وتسب
...ولّي عرقو عليه يصب
***************
وحدة خطيبها هرب
الاخرى شي ما كتب
وهذي مكنها العصب
ماعادش تقراالكتب
تخاف من سيرة الحب
***************
لاخر في مخّو تضرب
خرج من حلتو تغلب...
ما ينفع معاه الطب
يا والله على الحب ...
متهوم دوّخ العرب...
*************
ما تسمع كان غدرني..
عدّاها عليّ وقهرني
والله اش يصبّرني
درولّي حالي حيّرني
نشكيه للمولى سهّرني
*************
شدّوه خاطف قلبي جيبوه
خذالي عمري أعطوه
بأمر الحب مسكوه
دبشي في دار بوه
وراء الشمس بعثوه
*************
الخاين...
كان حبّي عليه هاين
شي ما كان باين
علاش من دون الكناين
العدل في احوالي يعاين
ما خلاّلي كان العباين
*************
دخلت لسوق الحب
ماخرجت كان بعجب
كل شي منّي تنهب
احساسي وعقلي تسلب
ماسي فيه تصب
الحب صار يرعب
*************
نحلف لاعاد ندخلّو
ولا يجي على لساني ولا نبلّو
يا عيب على الناس ما ملّو
انصح غيرك ودلّو
ابدا عاود وقلّو
************
إلّي يجيني ع الحب
مانيش تحت الطلب
مسكّر صابني عطب
ماعاد في الحب نرغب
قلبي شعّلتو حطب
************
كلمات/ ناصر زيتوني
القيروان
14/8/2010