حَطْيتْ رَاسِي عَ الْمَخَدَّة نْكُتْ

حَطْيتْ رَاسِي عَ الْمَخَدَّة نْكُتْ....وْيَامَا لَيَالِي فُوتْ مَا كَتِّيتْ

لَانِي مَرِيضْ وْلاَ عَلَى اللِّي غْدِتْ....وْلَابِي مَسَسْ مِنْ شُورْ مَا لاَقِيتْ

لَكِنْ عَلىَ اللِّي بِالثَّرَى تِسْوِتْ....تَحْتَ اللُّحُودِ قْلَيِّبِي خَلِّيتْ

مَنْ دَمْعْتِي حَرْمَلْ عَ الْخُدُودِ نْبِتْ....وْمِنْ آهْتِي الأَشْواكْ تُقْطِرْ زِيتْ

كَانِتْ مَعَانَا عْلِيهَا الْعُيُونْ عْمِتْ....وِالْيُومْ غَابَتْ يَاوِيلْ مَاحَسِّيتْ

يَا لَحْدْ تَحْتَكْ مَنْ عَلِيناَ فْنِتْ....وْ يَا قَبْرْ مَالِكْ لاَ تْرُدْ مَا خْذِيتْ؟

يَا(رِبْحْ) بَعْدِكْ الْعُيُونْ مَا رِتْ....وْ يَا قَلْبِ نَابِضْ آهْ لَوْ وَلِّيتْ.

أَفْرَاحْ تِشْهِدْ يَامَا بِيهَا زْهِتْ....وْ يَا مُوتْ قُولْ انَّكْ بهَا خَفِّيتْ

يَامَا الخِلَالَة فَي اللَّيَالِي دْوِتْ....الرَطَّابْ هَدْهِدْ سَامْعِي وِ غْفِيتْ

يَا دَهْرْ انْطِقْ ..قُولْ يَامَا عْلِتْ....وْ يَا سَقْفِ هَوَّدْ مِنْ حِملِ البِيتْ

بْعِينِي نْشُوفْ الْقَافْلَة كِي مْشِتْ....وْ بْعِيرْهَا حَثِّ الْخُطَى مْعَ الْمِيتْ

حَتَّى الْخَلِيفْة كْرُومْتَهْ تِلْوِتْ....قَادَ الْقَبِيلَة صُوبْ عُرْضِ الْحِيطْ

نَجْعِكْ عَلِيهْ الذَّارْفَاتْ بْكِتْ....وْ هَذِي خِيَامَكْ فَرِّ مِنْهَا الْخِيطْ

عَطْشَى الْمَوَاشِي مِ الْجَفَافْ رْوِتْ....و ِالنَّهْر ِجَارِي لاَ نَبَاتْ سْقِيتْ

كُلِّ الْجِرَاحِ الثَّاخْنَاتْ بْرِتْ....وْ جُرْحِي يْصَرَّخْ كُلْ يُومْ أَحِّيتْ

سِطَّاشْ عَدُّوا نَارْهُمْ مَا وْفِتْ....كُلْ يُومْ ذِكْرَى عَامْلَة لِبْطِيطْ

عبدالستار زروقي