طَلْبُوا مِنِّي الْيُومْ نْسَامَحْ

طَلْبُوا مِنِّي الْيُومْ نْسَامَحْ
---------------------------
طَلْبُوا مِنِّي الْيُومْ نْسَامَحْ...............نِتْنَاسَى اللّيِ هَزْ الدَّزَّة
قُلْتُلْهُمْ هَاتُولِي الْبَارِحْ..................نِتْلَاقَى فِي بْحِيرَةْ حَمْزَة

هَاتُولِي الْبَارَحْ قُدَّامِي.........اللِّي حْرِمْنِي مِنْ غَمْضَةْ عِينِي
اللِّي هَرَّسْ لَحْمِي وعْظَامِي..............اللِّي كَاتِمْ فِيَّا أَنِينِي
خَلاَّنِي مَانْشُوفْ قُدَّامِي..................مَانِْطيقْ الْقَعْدَة وِالْفَزَّة
طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

هَاتُوا الْبَارِحْ جِيبُوهُولِي................نِتْحَاسِبْ ع َاللِّي شُفْنَاهْ
كَيفَاشْ نْسَامَحْ قُولُولِي..................وْفِينَا الْمَيِّتْ وِاللِّي تَاهْ
وْفِيهُمْ لِضْنَايَا قِتْلُولِي....................وْفينَا شْهَايِدْ عَرْفِتْ كَزَّة
طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

لاَ نْساَمَحْ مِيتْ وْلَا حَيْ.............وْلَا اللِّي خَارِجْ وَطْنُو هَارِبْ
لاَنْسَامَحْ لاَ نْسَلِّمْ شَيْ............ِوفْسَادْكُمْ فِي الْأُمَّة ضَارِبْ
كُلْ اللِّي حَاجْتِي يَا وْخَيْ................كَرَامَة تْعَيِّشْنِي بِالْعِزَّة
طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

رُدُّولِي حْقُوقِي الْمَنْهُوبَة...............اللِّي هَرْبِتْ لِبْنُوكْ الْبَرَّة
هَاتُولِي ارْوَاحْنَا الْمَسْلُوبَة........اللِّي تْخَطْفِتْ عَ الْحِينِ غِرَّة
وِاللِّي سَاكِنْ تَحْتِ الطُّوبَة.........عَايِشْ وُسْطِ الضِّيقْ وِاللَّزَّة
 طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

نَاحَقِّي مَانْسَلَّمْ فِيهْ......................لاَ بُدَّ فِي يُومْ يَرْجَعْلِي
عَرْقِي سَالْ تْعِبْتْ عْلِيهْ............حَتَّى لِينْ عِرْقِي تْقَطَّعْلِي
وِانْتَ بَارِدْ تُشْرُبْ فِيهْ.........................تَرْضَعْ فِيَّا مَزَّة بْمَزَّة
طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

سْنِينْ الظُّلْمَة مَانَنْسَاهَا................مَانَنْسَى عيَشِةْ لِقْهَرْ
غْشَاكُمْ تْعَدَّى لْعِينِي عْمَاهَا........فِينْ مَانِلْمِسْ نَلْقَى ضْرَرْ
قْصُورْكُمْ شَيَّدْتُوهَا بِيهَا...............حَتَّى غْطَايَا طْمَعْتْ تْهِزَّهْ
طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

مِنْ فِيكُمْ يْحِبْ يْسَامَح............... يْقُولِلْنَا عْلَاشْ وْ كِيفَاشْ
يْجِيبْ سْبَبْ عْلاَشِي طَامَحْ..........فِي حْقُوقَهْ مَا يْتَبَّعْهَاشْ
بَالِكْ نْغَيَّرْ بَرْشَة مْلاَمَحْ..................يْبَانْ الْخَايِفْ وِاللِّي لَزَّهْ
طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

نِتْصَالَحْ وَقْتْ اِلْ نِتْصَافَى..............وْيُخْرُجْ مَافِي الْقَلْبْ لْبَرَّة
وْلاَ نْعِيشْ نْعَامَة خَوَّافَة....................وغْرِيمِي مْتَلِّفْ الْجُرَّة
نْعُودُوا خِيوَة مَانِتْجَافَى..................لاَ مِنْ طَاحْ وْ لاَ مِنْ دَزَّة
طَلْبُوا مِنِّي الْيُومْ نْسَامَحْ /// نِتْنَاسَى اللّيِ هَزْ الدَّزَّة

عبدالسّتّار زرّوقي