الدّروس الخصوصيّة

الدّروس الخصوصيّة
==========
الدّروس الخصوصيّة في البحر حلّت ثنيّة
فكّرت ماذا بيّ بيها ندعّم الشّهريّة

نظّفت القاراج خرّجت منّو كلّ دجاج
ماعز ونعاج نمنّي نفسي بعيشة هنية

دبّرت راسي وعملت من المَادْرِي كراسي
صابورة ملاّسي باب خذيتو من ساسيّة

بديت انْدُورْ ع البسكلات وع الموتور
براري وبحور نِقْبِلْهَا عزري وشِنْـتِـيَّة

ْنظّمت الأفواج وقسّمت ذراري الفِيلَاج
يخلف عَ -الدِّيكَالَاجْ -وسّع الخدمة عليّ

صُبْح وعشاء هذا مشى وهذا جا
لاراحة لاهنا تخمامي في الميزانيّة

أنت وقتك في الصّباح وانت الفجر إذا لاح
وانت مع الدّيك الصّياح نلقاك تستنّى فيّ

بدات الكريشة تكبر وبدا الجيب يتعمّر
وبدا الخير يكثر وصرت من البَلْدِيَّة

الصّيف يصيّف نعشّي نْشَيِّشْ ونِتْكَيِّفْ
لباسي رْهَيِّفْ عْرَفْتْ معنى العشويّة

كبرت أرزاقـي في كلّ برّ مدّيت ساقي
بدّلت صْداقي و خذيت دروس لُصُوصِيّة

**عبدالسّتّار زرّوقي —