♡" يازائر القيروان"♡

يا رايحين همّي في بعادك زاد / نبغي نشوفك وما باليد حيله

قلبي سجينكم و الفراق صيّاد / ليمتى نصبّره والثّنيّة طويله

عيني سهّادة ماليها رقاد /لا النوم يطرق الجفون الكحيله

حرّقني الشّوق والقلب ماعاد /أقدر أصبّره اكثر من ليله

هَذَا لِيلِي وْ الفَجْرْلِي مِيعَادْ / كِيفْ كُنْتْ أَعَانِدْ جَذْوَتِكْ يَافْتِيلَهْ

يْذَوَّبِكْ مَوَّالِي ويْحَوَّلِكْ لِرْمَادْ / ِويحِلْ ضَوْ النَّهَارْ يْلَاقِيكِ قْتِيلَهْ

مَاهُو شَدْ مِنِّي وَلَا كُثْرْ عْنَادْ / وَلَكِنْ القَلْبْ تْفَجَّرَهْ مْوَاوِيلَهْ

وِ الصَّدْرْ مْعَمَّرْ مَايَنْتَظِرْ زْنَادْ / وَالآهْ طَلْقَهْ تُرْدِي الجِبَالْ قْتِيلَهْ

والقلب يعاند خطوتك ياجياد/ وتوصل للقمر رنّات صهيله

ويرجع صداه من قبل ميعاد/ ويسبق خيلك ومايحط رحيله

صبّرت روحي والصّبر مافاد / وعميق جرحي ماريت مثيله

صار زي الخيام ناقصات اوتاد/ تعرّيها الرّيح ولوكانت قليلة

رحيلك يا الغالي كالجمر وقّاد/ في اوصالي يسري كل ما اهوّيله

كل ما اطفّيه الاقيه انزاد / سوّى في الحشى نار شعيله
حكمك والحكم علي راد /حطّم فيّ جدار الهنا بمعاويله
ظلمك و الجفى عليّ ساد / لا عدو يشمت ولاصاحب اشكيله
غير الظلام يتربّص بسواد / يلوّحلي في الخلا بمناديله
استلقي والثرى ليّ وساد/مالي غير دموع القهر اهديله