نتمنّى زينك وصِفْتَهْ

نتمنّى زينك وصِفْتَهْ // مَا يـْخُونْنِي التَّعْبِيرْ

رَكَّبْتْ كْلاَمِي رَصَّفْتَهْ// لْقِيتْ حُسْنِكْ خِيرْ

حَاوِلْتْ عَاوِدْتْ أَلَّفْتَهْ // عْجِزْتْ فِي التَّقْدِيرْ

شْنُوََّة الذَّنْبْ الِّي اقْتَرَفْتَهْ // حَتَّى فِيكْ نْحِيرْ

لْيَالِي ..النُّوم مَا عْرَفْتَهْ//احْتَرْتْ فِي التَّصْوِيرْ

شَيْطَانْ شِعْرِي لاَطَفْتَهْ // بْعَثْتَهْ لِيكْ يْسِيرْ

مِتْعَوِّدْ يُوحِي عَ اللَّفْتَة // لاَ يْكِيدَهْ تَدْبِيرْ

رْجَعْلِي مِثْلْ الِّي كَتََّفْتَهْ // دَقِّيتَهْ بِمْسَامِيرْ

قَامُوسْ كْلاَمِي نَظَّفْتَهْ // حَطِّيتَهْ فِي بِيرْ

أَقْسَمْتْ عْلِيهْ وْحَلَّفْتَهْ // يِكْتِبْلِي التَّقْرِيرْ

قَلِّي كْلَامِي تَلَّفْتَهْ // بْنُورْهَا صِرْتْ ضْرِيرْ

كْرَهْتْ الشِّعْرْ وِزْعِفْتَهْ // لَوْ يْرُدْنِي أَمِيرْ

َناَ شْطَرْ ُعْمْرِي نَاصَفْتَهْ // مْدَّلِّلْ وِ وْزِيرْ

اليُومْ فِي حُبِّكْ خَلَّفْتَهْ// عَايِشْ كِالَأسِيرْ

رَاسْ مَالِي عْلِيكْ صْرَفْتَهْ // نِبْغِي نْوَلِّي بْصِيرْ

وْخَيَّانِي زِينْهَا مَا شُفْتَهْ // عْجِزْتْ عْلَى التَّفْكِيرْ

ضْرَبْتَهْ بِكْلاَمِي وِقْصَفْتَهْ // وْقُلْتْ فِيكْ كْثِيرْ

ْشِعْري قُدَّاَمِكْ وَقَّفْتَهْ // قُدَّامْ شَعْرِكْ لَغْزِيرْ

كُلِّ الِّي نْرِيدَهْ قْطَفْتَهْ // بْـَمَجْهُودْ صْغِيرْ

شِعْري طُولْ ُعُمْرِي احْتَرَفْتَهْ //فِي زِينِكْ صَارْ حْقِيرْ



*عبد الستار زرّوقي
القيروان
تونس